DILI (TOP) – Lider Karismátiku, Kay Rala Xanana Gusmão vizita prijioneiru sira hamutuk 501 iha Prijaun Bekora molok husik tinan tuan 2021 hodi hakat ba tinan foun 2022 ho vijaun foun.
The Oe-Kusi Post (TOP) observa, prezensa Xanana iha prijaun Bekora ne’e iha oras tuku 9 dadersan, la’os vizita mamuk de’it, maibé lori mós sasan nesesidade báziku iha kareta truck ida nakonu hodi fahe ba prijioneiru sira iha prijaun laran.
Xanana husu ba kondenadu sira atu labele sente triste, tanba sira rasik maka estraga tiha ona sira nia moris, maibé Xanana fó korajen ba prijioneiru sira katak, tenke uja didi’ak sira nia tempu durante iha prijaun laran ne’e hodi rekopera aan, no hadia aan rasik atu nune’e aban-bainrua sai fali karik bele sai sidadaun ne’ebé di’ak.
“Fatin ne’e tempu atu rekopera aan, hadia aan hodi fila-fali ba sai sidadaun ne’ebé di’ak. Ita hotu sala nain, ita umanu ne’e sempre sala, maibé atu sai umanu loloos koriji husi sala maka bele sai umanu loloos,” hateten Xanana ba prijioneiru sira iha Prijaun Bekora-Dili, Sesta, 24 Dezembru 2021.
Iha fatin hanesan, Diretor Prijaun Bekora, João Domingos hateten, kada tinan nia rohan, molok atu festeza Nai Maksoin Nia loron moris, parte prijaun Bekora sempre simu vizita husi familia inklui lider sira hodi vizita sidadaun sira ne’ebé oras ne’e tuir hela rehabilitasaun iha prijaun Bekora.
“Iha ema barak maka mai vizita ona, no ohin hamutuk ho Maun Boot Kay Rala Xanana Gusmão,” nia hateten.
Nia hatutan, oras ne’e iha ema nain 501 maka iha hela prijaun Bekora.
