DILI (TOP) – Relatóroiu trimestral Banco Central Timor-Leste (BCTL) hatudu osan mina no gas sa’e husi billaun 18,47 ba billaun US$18,99 iha loron loron 31 Dezembru 2020.
Tuir informasaun ne’ebé The Oe-Kusi Post (TOP) asesu iha pájina ofisial BCTL iha loron 8 Fevereiru 2021 katak, relatóriu trimestrál Fundu Mina-Rai Timór-Leste nian ba trimestre ne’ebé termina iha loron 31 fulan Dezembru tinan 2020 katak, fundu mina-rai Timor-Leste nian oras ne'e hamutuk billiaun US$18,99 kompara ho billiaun $18,47 iha fim trimestre dahuluk.
Relatóriu ne’e mós hatudu katak totál reseitas mak simu iha trimestre ne’e hamutuk millaun $35,78 ne’ebé kompostu husi kontribuisaun kontribuinte sira ba Fundu hamutuk millaun $27,41 no pagamentu royalty simu husi Autoridade Nasionál Petróleu (ANP) mak millaun $8,37.
Rendimentu husi investimentu Fundu nian ne’e hamutuk millaun $958,45 kompostu husi kupaun no jurus ne’ebé simu mak millaun $73,37, mudansa iha valór merkadu nian millaun $885,58 no movimentu cambiais lakon mak millaun -$0,50 iha trimestre ne’e.
“Ne’e rezulta rendimentu ba karteira Fundu nian durante trimestre ne’e 5,21% enkuantu rendimentu sasukat (benchmark) nian ba periodu ne’e mak 4,69%”.
Pontu importante husi Relatóriu Trimestre ba dala LVI, ne’ebé kobre períodu 01 fulan Outubru tinan 2020 to’o loron 31 fulan Dezembru tinan 2020, inklui:
- Totál Kapitál Fundus nian mak billiaun $18,99.
- Osan kontadu brutu fundus nian tama husi kontribuisaun kontribuinte, realeza (royalties) hamutuk mak millaun $35,78.
- Osan kontadu líquidu ne’ebé sai husi Fundu durante trimestre ne’e hamutuk millaun $471,69 kompostu husi millaun $466,80 transfere ba Orsamentu Estadu no millaun $4,859 kobre kustus jestaun nian.
- Reseitas líkidus durante trimestre ne’e hamutuk millaun -$431,69.
- Reseitas portofoliu iha periodu ne’e mak 5,21% kompara ho retornu referensia mak 4,69%.
