NOVA IORKE (TOP) - Iha dalan ida ne’ebé boot ba jornalismu Timor oan, The Oekusi Post (TOP) hahú ninia kapítulu foun. Ba dala uluk desde existe no hamrik iha fulan Marsu 2020, media online ki’ik ida ne’ebé foka ba Rejiaun Administrativu Espesial Oe-Cusse Ambeno (RAEOA) no Zona Espesiál ba Ekonomia no Sosial Merkadu (ZEESM) ne’e kontinua hetan netik konfiansa husi Palásiu Prezidensiál atu partisipa no halo kobertura direta ba sesaun Assembleia Jerál ONU nian ba dala 81, ne’ebé realiza iha loron Tersa, 22 Setembru 2026, iha Kuarté Jerál ONU iha Manhattan, Nova Iorke, Estadus Unidus Amerika.
Fundador no Xefe Redasaun The Oekusi Post (TOP), Raimundos Oki, oras ne'e iha hela Kuarté Jerál ONU, iha edifísiu ne'ebé sai símbolu ba diplomasia mundiál, hodi prepara ninia kobertura ba momentu ne'ebé sei junta lider sira husi mundu tomak atu diskute futuru komún.
Viajen ida husi Ambeno
Maski ohin loron nu'udar marka istóriku ba The Oekusi Post nu'udar media online ki’ik ida, la'ós dala uluk ba Raimundos Oki. Antes media online ne'e mosu, jornalista ne'e hatudu ona kapasidade no dedikasaun iha eskala internasionál, nia ba dahuluk ona Kuartél Jerál ONU nian iha tinan 2015.
Iha tempo ne’eba, Raimundos Oki manan Reham Al-Farra Memorial Journalism Fellowship 2015, ne'ebé lori nia ba Nova Iorke iha Setembru 2015 nu'udar reprezentante husi Timor-Leste. Rekonhesimentu ne'e la'ós rohan, maibé komesu ba viajen kontínuu ida. Iha tinan 2019, nia hetan tan fellowship seluk, UN LDC5 Journalism Fellowship, ne'ebé fó fali oportunidade ba nia ba halo kobertura Assembleia Jerál ONU nian iha tinan tempu ne’eba.
Agora, iha tinan 2026, istória ne'e halibur aan no hamutuk aan fila-fali. Ho apoiu husi Palásiu Prezidensiál, Raimundos Oki hetan fali konfiansa ba tama iha edifísiu ida ne'ebé ohin loron sai dala tolu ona ba nia ba iha Kuartél Jerál ONU atu kobre asuntu boot sira ne'ebé sei fó impaktu ba nasaun ki'ik sira hanesan Timor-Leste.
Media ki’ik husi rai-ki’ik Ambeno, sente orgullu boot
The Oekusi Post nu'udar media online ki'ik ida ne'ebé moris husi rai ketan Oe-Cusse Ambeno. Tanba ne'e mak ekipa redasaun sente onradu no privilejiu tebes ho oportunidade murak ida ne'e, sentimentu ida ne'e la'ós konkista profisionál de’it, maibé mós nu’udar rekoñesimentu ba rejiaun (Oe-Cusse Ambeno) ne'ebé baibain dook husi sentru atensaun nasionál.
The Oekusi Post hatene klaru katak oportunidade sira hanesan ne'e, atu ba media ki'ik sira, la'ós buat fasil ida. Portál diplomátiku boot sira hanesan Assembleia Jerál ONU baibain domina husi jornalista husi media boot sira, husi nasaun boot sira ho rekursu mós boot. Atu media ki'ik ida, ho história kuriña, konsege tama iha meiu ne'e, nu'udar konkista ne'ebé difisil tebes atu hetan.
Maibé The Oekusi Post konsege. Tanba ne'e, ekipa redasaun hato'o agradesementu boot ba ekipa Palásiu Prezidensiál ne'ebé fó konfiansa ba media online oan ne'e hodi partisipa no halo kobertura direta ba eventu istóriku ne'e iha Kuartél Jerál ONU, Nova Iorke, Estadus Unidus Amerika.
Se ba Raimundos Oki, ne'e ba dala tolu, ba The Oekusi Post nu'udar media online ki’ik ida, ba dala uluk. Media online oan ne’e, ne'ebé sempre defende importánsia husi rejiaun Oe-Cusse Ambeno no koko atu lori lain husi rejiaun rurál no distante ba diskusaun nasionál no internasionál, agora hetan plataforma atu hatudu katak jornalismu husi rejiaun ki'ik, rai ki’ik mós bele hetan fatin iha eventu boot sira.
Oportunidade ida ne'e reforsa mós filosofia jornalístiku ne'ebé Raimundos Oki hakarak lori, katak jornalista sira husi estadu ki'ik hanesan Timor-Leste sai importante atu iha reprezentasaun forte iha espasu polítika no formasaun internasionál, espasu ne'ebé baibain domina liu husi jornalista husi nasaun boot sira.
Kobertura direta ba Assembleia Jerál ONU ba dala 81 sei fó valór ba The Oekusi Post tanba, akompaña direta esplika prosesu diplomátiku boot ida ne'ebé toka mós povu Timor-Leste nia moris husi mudansa klimátika, dezenvolvimentu, direitu humanu, to'o relasaun internasionál ne'ebé bele influensia futuru Timor-Leste nian.
Ba Raimundos Oki no ba ekipa The Oekusi Post tomak, viajen ne'e reprezenta hakat ida tan iha misaun kontínuu atu garante katak lian husi Oe-Cusse Ambeno, no husi Timor-Leste tomak, nunka lakon iha meiu diskusaun global sira.
