DILI (TOP) – Primeiru-Ministru, Taur Matan Ruak hateten, nia lamenta tebes ho aktu violensia ne’ebé akontese iha sidade Dili no mós sente arepende tebes ho “reativasaun grupu artemarisias” iha rai-laran ne’ebé ikus mai rezulta ona sidadaun balun tenke hetan kanek todan no balun tenke mate ona.
“Ha’u sente triste, lamenta no arrepende haree violénsia foin liubá iha Kapitál Dili. Nu’udar Primeiru Ministru ha’u husu deskulpa tanba perturba inan-aman, komunidade no sidadaun sira nia hakmatek," PM Taur hato'o lia hirak ne’e liu husi nia komunikadu ba imprensa asesu, Tersa 6 Setembru 2022.
PM Taur husu ba sidadaun hotu iha rai-laran atu deklara katak violensia nu'udar aktu ne’ebé viola direitu umanu no estraga soberania, nune'e kompromete sei kombate krimenozu to'o nia abut.
"Mai ita deklara violénsia hanesan inimigu ba ita nian, no promete kombate hasoru violénsia to’o halakon iha ita rain," Taur promete.
Nune'e hanesan ministru interior nia alerta ona ba komandu PNTL atu reforsa no hametin liutan vijilansia hodi garante no mantein ordem públiku iha territoriu laran tomak. No, ho haraik aan nia husu ba juventude tomak atu hakamatek hodi kontribui ba estabilidade nasionál.
Maibe, kona-ba krime ne’ebé akontese hanesan baku membru F-FDTL, nia husu husik problema krime ne’ebé akontese ona entrega ba dalan justisa.
Atu responde ba situasaun ne’e, Vise-Ministru Interiór no Ministru Defeza hasai ona despaixu konjunta ne’ebé publika ona iha Jornal Republika, N.º 01/MI-MD/IX/2022, ho objetivu atu halo operasaun konjunta entre FALINTIL-Forsa Defeza Timor Leste (F-FDTL), no Polisia Nasionál Timor-Leste (PNTL) durante semana ida atu minimiza violénsia no aktu kriminál iha territóriu nasionál liliu iha kapitál Dili, hodi garante paz no estabilidade iha Timor-Leste.
Despixu ne’e tama vigór iha loron assinatura iha loron 06 Setembro 2022 no sei termina iha oras tuku 23:59 loron 13 Setembru 2022, no bele renova bazeia ba avaliasaun.
Despaixu ne’e asina husi Ministru Defeza interinu Fidelis Manuel Leite Magalhães no Vise-Ministru Interiór António Armindo.
Situasaun ne’e halo eis Primeiru-Ministru, Kay Rala Xanana Gusmão husu ba lider grupu artemarisiais sira tenke responsabiliza ba membru sira ne’ebé halo aktu krime iha rai laran.
Nune’e mós, sua Eminênsia Virgílio Cardeal do Carmo da Silva, SDB, husu atu lider sira grupu arte marsiál (GAM) ho grupu arte rituál (GAR) mantein fó orientasaun no eduka membru sira haburas virtude domin no dame hodi garante moris hakmatek iha sosiedade.
