DILI (TOP) – Komisaun ba Anti-Korupsaun (KAK) halo intervensaun hodi hapara ona prosesu rekrutamentu ba guarda florestal sira ne’ebé iha indikasaun forte ba manipulasaun.
Komisariu Adjuntu KAK ba Asuntu Prevensaun no Sensibilizasaun Luis de Oliveira Sampaio lidera ekipa Quadrilateral; KAK, Komisaun Funsaun Públika (KFP), Provedor Direitur Humanus no Justisa (PDHJ) no Inspector Geral Estado (IGE) iha loron Sesta 10 Juñu 2022 ne’e halao sorumutu ho Diretor Geral Floresta no Prezidenti Ekipa Juri rekrutamentu nian Simão Raimundo Mau no deside suspende prosesu rekrutamentu Guarda Florestal hamutuk nain 184 iha Ministério Agrikultura ne’ebé sai preukupasaun públiku semana ne’e.
Komunikadu imprensa husi KAK katak, desijaun suspende prosesu ne’e foti hafoin iha lamentasaun husi públiku ne’ebé iha kandidatu nain 20 husi kandidatu 184 ne’ebé liu iha prosesu rekrutamentu ne’e iha indikasaun irregularidade forte.
Diretor Geral Floresta no prezidenti juri Simão Raimundo Mau konkorda suspende rekrutamentu ne’e inklui halo kanselamentu ba salariu guarda florestal sira ne’ebé asina ona kontratu.
Indikasuan irregularidade forte ne’e tuir dokumentu ne’ebé KAK no ekipa Quadrilateral simu ona kandidatu balun ne’ebé la liu iha teste selesaun dokumentu no eskrita maibé naran sai iha rezultadu final aprovadu klasifikadu no kontratu asina tiha ona.
Ba interese transparansia prosesu rekrutamentu iha instituisaun públiku no integridade di’ak membrus ekipa juri nian tuir Lei Nu. 7/2020 26 Agosto - Medidas Prevensaun no Kombate Korrupsaun (MPCC), Komisariu Adjunto KAK Luis Sampaio lori ekipa Quadrilateral nian naran husu ba DG Raimundo Mau atu suspende prosesu rekrutamentu.
Alem de suspende rekrutamentu, KAK mós husu ba komisaun rekrutamentu atu fornese informasaun hotu kona-ba prosesu rekrutamentu husi inisiu simu dokumentu to’o publikasaun final naran kandidatu sira nian ba iha KAK tarde liu Sesta ne’e iha oras tuku 5;30 OTL oras serbisu nian.
“KAK la impede prosesu rekrutamentu ida ne’e maibé atu defende transparansia prosesu rekrutamentu iha instituisaun públiku no integridade no naran di’ak membrus juri sira nian. KAK mos labele taka mata ba lamentasaun sira husi públiku ne’ebé sai viral iha media social,” Katak Komisariu Adjunto Luis Sampaio ba prezidenti juri Raimundo Mau durante sorumutu.
Prezidenti juri no DG Guarda Floresta Raimundo Mau promote sei kumpri ejijensia KAK nian hodi lori dokumentus hotu relasiona ho prosesu rekrutamentu Guarda Floresta nian ne’ebé sai viral iha media social no sai atensaun públiku mai iha edifisiu KAK Farol Sesta-feira loraik ne’e molok tuku 5;30 OTL.
Xefe Unidade Informasaun no Seguransa Euclides Madeira nudar unidade serbisu sekreta nian iha KAK simu tiha ona informasaun no dokumentu komprovativu balun ne’ebé indika iha duni indikasaun irregularidade durante prosesu rekrutamentu Guarda Floresta ne’ebé ekipa juri komete no sei tuir investigasaun kriminal bainhira dokumentu ne’ebé KAK sei simu iha loraik ne’e komprova.
