Oekusipost.com Dili – Governu Timor-Leste aprova ona rezolusaun ida iha reuniaun Konsellu Ministru sira hodi bandu sidadaun sira husi nasaun 4 labele tama mai Timor-Leste nu’udar aktu prevensaun ba virus corona ne’ebé hamate ona ema barak iha mundu.
Rezultadu reuniaun Konsellu Ministru sira iha loron Kuarta 11 Marsu 2020 aprova ona rezolusaun ida ne’ebé hato’o husi Ministru Negósiu Estranjeiru no Kooperasaun, Dionísio da Costa Babo Soares atu hanaruk aplikasaun no ezekusan medida temporaria durante semana 4 nia laran ba sidadaun sira husi nasaun 4 ne’ebé tranzitu iha Repúblika Popular China, Repúblika Korea, Repúblika Italiana no Repúblika Islâmika Iraun.
Nune’e, iha mós iha aprezentasaun ida husi Ministra Saúde interina, Élia António de Araújo dos Reis Amaral atu analiza pontu situasaun ba medida prevensaun Nobel Coronavirus (COVID-19). Diresaun Jeral Prestasaun Saúde iha Ministériu Saúde akompaña hela situasaun epidemiolójika iha orientasaun téknika husi Organizasaun Mundial ba Saúde (OMS) ne’ebé kolabora ho Laboratóriu Nasionál Saúde, Hospital Nasionál Guido Valadares (HNGV), no autoridade sira ne’ebé kontrola jestaun portu entrada no seluk tan.
Iha fulan Janeiru 2020, OMS deklara epidemia virus corona (COVID-2019) nu’udar saúde emerjensia internasional.
Virus corona mai husi sidade Wuhan, iha provinsia Hubei, China Sentral. Konta OMS durante ne’e (iha relatóriu 9 Marsu) konfirma kazu hamutuk 109 577, iha China rasik hamutuk 80.904. Kazu virus corona sirkula ona iha nasaun hamutuk 104 ne’ebé konsege hamate ona ema hamutuk nain 3.809 (nain 3.123 mate iha China no hamutuk nain 686 iha nasaun seluk). (*)
