Xanana tun iha aeroportu Halim Perdanakusuma

DILI (TOP) – Lider Karismátiku Kay Rala Xanana Gusmão ne’ebé sai husi aeroportu internasional Presidente Nicolau Lobato iha loron Kuarta 18 Novembru 2020 tun iha aeroportu internasional Halim Perdanakusuma iha Jakarta Leste.

Tuir informasaun balun ne’ebé The Oe-Kusi Post (TOP) asesu katak, Kay Rala Xanana Gusmão to’o iha aeroportu ne’e besik oras tuku 5 lorokraik iha loron Kuarta 18 Novembru.

“Ohin to’o Jakarta tun iha aereportu Halim Perdanakusuma. TNI husi Angkatan Udara (AU) maka simu ami depois polisia trânzitu lori ba hotel hanesan Prezidente Repúblika seguransa metin,” haktuir pessoal ne’ebé simu Xanana iha aeroportu Halim ba TOP, Kinta 19 Novembru 2020.

Pessoal ne’e hatutan, viajen eis Komandante em Chefe das FALINTIL ne’e ba Jakarta, Indonézia tanba fasilita husi governu Indonézia liu husi Ministériu Negósiu Estranjeiru no Ministériu Saúde nian ne’ebé orienta embaixada Indonézia iha Dili atu apoiu ba vizita ne’e.

Oras ne’e dadauk mós públiku balun sente konfujaun kona-ba viajen ne’e rasik, balun dehan ba Japaun no balun dehan ba nasaun seluk, maibé informasaun ne’ebé TOP iha katak viajen ne’e ba iha Jakarta, Indonézia. No Mensajen ne’ebé nia hato’o ba Tokyo, Japaun ne’e halo liu husi gravasaun video iha GMN TV iha loron 16 Novembru 2020 oras tuku 10 kalan, no video ne’e foin maka fó sai fali iha Tokyo, Japaun iha loron Kuarta 18 Novembru 2020.

Vizita Kay Rala Xanana Gusmão ba Jakarta atu tuir enkontru importante balun no sei hala’o mós check up ba nia saúde molok fila mai Timor-Leste iha semana ruma nia laran.

Lider Karismátiku Kay Rala Xanana Gusmão iha aeroportu Nicolau Lobato, Comoro, Dili molok sa'e ba aviaun Jet privadu ho marka Jet Hawker 800 hodi ba Jakarta iha loron Kuarta 18 Novembru 2020. Foto TOP/Raimundos Oki.
Raimundos Oki
Author: Raimundos OkiWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Xefe Redasaun & Editor

PUBLISIDADE