Ema Nain 5 Sai Ona Husi Sala Izolamentu

Estudante feto ida hato'o hela agradesimentu ba profisional saúde sira iha sala izolamentu Vera Cruz. Ohin ema hamutuk nain lima mak sai ona husi Vera Cruz ba sira nia familia sira. Foto Oe-Kusi Post/Marcelino Bata.

Oekusipost.com Dili – Sidadaun Timoroan nain lima (5) ne’ebé antes ne’e kategoria ba kazu provavél ba moras virus corona (COVID-19), no tama iha sala izolamentu iha sentru saúde Vera Cruz, ohin loron sira sai ona husi sala izolamentu ne’e hodi ba hela hamutuk ho sira nia familia sira, tanba sira di'ak tiha ona. 

Dotora Odete da Silva Viegas hatete, progresu ikus ohin loron Sábadu 25 Abril 2020 iha horas tuku 3 lorokraik hatudu ema hamutuk nain 5 ne’ebé kompostu husi nain 2 husi Hotel-Katuas, nain 2 husi Hotel Fortuna, no nain ida husi Hotel Novo Horizonte.

“Total kazu rekoperadu ka kuradu nain 6, nain 5 horseik rekoopera, no nain ida kazu primeiru nian. Hamutuk nain 6. Númeru mate to’o agora felizmente seidauk iha,” hateten dotora Odete liu husi konferensia ba imprensa iha Sala Situasaun Sentru Integradu ba Jestaun Krize iha Sentru Kovensaun Dili, Sábadu 25 Abril 2020. 

“Rekoperadu nain 5 ne’e, husi provavél 4 no positivu ida kompleta ona sira nia teste laboratóriu dala rua tutuir malu negativu, dadauk ne’e ita fó sira fila ba sira nia familia,” Odete esplika.

“Ida ne’e atu hatudu mós katak esforsu tomak ne’ebé mak governu liu husi Ministeríu Saúde ho nia ekipa tomak nia kontribuisaun tomak ohin loron ita bele fó fila-fali ita nia maluk nain 5 ba iha komunidade, ba iha familia”.

Nia hatutan, númeru kazu konfirmadu nafatin de’it ba nain 24, kazu foun mós ohin laiha, kazu rezultadu teste negativu ohin hamutuk nain 367 kompara ho horseik nian hamutuk 347. 

Seremónia husik ema nain lima sai husi sala izolamentu Vera Cruz, tanba sira di'ak ona. Foto Oe-Kusi Post/Marcelino Bata.  

Entretantu, reprezentante sira nain 5 ne’ebé di’ak ona hatete, durante hela iha sala izolamentu hetan tratamentu saúde di’ak tebes husi profisional saúde sira.

Ema nain lima ne’ebé ohin sai husi sala izolamentu mai husi munisipiu Dili, Manufahi, no Vikéké.

Hafoin seremónia ne’e iha Vera Cruz, parte governu mós atribui sertifikadu médiku ba sidadaun nain 5 ne’e nu’udar komprovativu husi sira nia kazu provavel ne’e.  

Seremónia husik ema nain lima sai husi sala izolamentu Vera Cruz, tanba sira di'ak ona. Foto Oe-Kusi Post/Marcelino Bata. 
Raimundos Oki
Author: Raimundos OkiWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Xefe Redasaun & Editor

PUBLISIDADE