DILI (TOP) – Prezidente Repúblika atual Prezidente Partidu FRETILIN, Francisco Guterres Lú Olo hateten, governu atual iha lejitimidade hafoin involve tan membru governu foun nain 8 ne’ebé simu ona posse.
PR Lú Lolo hatutan, Primeiru-Ministru propoin ba Prezidente Repúblika atu nomeia membru balun ba Governu no Konsellu Ministrus aprova alterasaun dahuluk ba orgánika VIII Governu, atu Governu sai forte liután no ukun di’ak liután.
“Governu ida ne’e iha lejitimidade konstitusionál no kbiit ida ne’e mai husi Parlamentu Nasional. Maioria foun ida mosu no fó dadaun ona apoiu ba Governu ida ne’e. VIII Governu hetan ona tanen husi maioria parlamentar ida no bele ukun to’o mandatu ramata,” Lú Olo hateten liu husi nia diskursu molok fó tomada posse ba membru governu foun nain 8 iha Palásiu governu Ai-Tarak Laran, Dili Sesta 29 Maiu 2020.
“Tanba hakarak kontribui ba hametin unidade nasional no promove polítika grande inkluzaun iha governasaun mak Prezidente Repúblika promove diálogu ho partidu polítiku hotu-hotu ho asentu iha Parlamentu Nasional no mós ho forsa polítika sira,” Lú Olo esplika.
Atual Prezidente Partidu FRETILIN ne’e katak, ho espíritu ida ne’e mak maioria partidu sira ho asentu iha Parlamentu Nasionál ko’alia ba malu no hatudu momoos ona saída mak sira hakarak.
“Situasaun ida ne’e enkoraja ha’u atu hala’o nafatin diálogu.”
Nia garante katak, iha ona sinal sira ne’ebé hatudu katak Unidade nasional entre partidu sira iha Parlamentu haboot liután ona. Ida ne’e mak povu hakarak. Povu hakarak unidade no ukun ida ne’ebé permite dezenvolvimentu nasional la’o lais liu no fó rezultadu di’ak liután.
“Ha’ u fiar katak ita hotu hakarak unidade atu bele hasoru dezafiu boboot sira ne’ebe la’ ós de’it dezafiu Estadu no Governu nian maibé ita-nia Nasaun tomak nian.”
Nia esplika, husi nia parte, nu’ udar Prezidente Repúblika, no hafoin haree no tetun didi’ak proposta husi Primeiru-Ministru.
“Ha’u deside simu proposta sira ne’e, no ho husi ha’ u-nia hanoin rasik no ha’u-nian de’ it, maibé haree mós ba ha’ u-nia kbiit konstitusionál mai husi alínea h) artigu 86 no númeru 2 artigu 106 Konstituisaun RDTL.”
“Nune’e, ita hakaat dadaun ba oin no kore-an dadaun ona husi situasaun ida ne’ebé konsidera hanesan impase polítiku kona-ba formasaun VIII Governu Konstitusional nian.”
Membru governu na’in-ualo ne’ebé simu ona posse husi Prezidente Repúblika mak Ministru ba Prezidénsia Konsellu Ministru, Ministru ba Assuntu Parlamentares no Komunikasaun Sosiál, Francisco Martins da Costa Perreira Jerónimo (FRETILIN), Ministru Finansas Fernando Hanjam (FRETILIN), Ministru Administrasaun Estatal Miguel Pereira de Carvalho (FRETILIN), Ministra Saúde Odete Maria Freitas Belo (FRETILIN), Ministru ba Assuntu Kombatentes Libertasaun Nasionál Júlio Sarmento da Costa ‘Meta Mali’ (PD), Ministru Agrikultura no Peskas Pedro dos Reis (Khunto).
Iha mós vise Primeiru-Ministru nain rua, Armanda Berta (Khunto), no tuir informasaun balun ne'ebé The Oe-Kusi Post asesu husi CCF katak FRETILIN indizita ona José Reis sai Vise Primeiru Ministru ne'ebé sei simu posse iha segundo ronde semana oin , maibé CCF rasik klarifika ona katak informasaun ne'ebé espalla iha públika kona-ba José Reis atu asume kargu vise segundu Primeiru-Ministru ne'e falsu, laloos ida.
