DILI (TOP) – Xefe Estadu Timor-Leste, Francisco Guterres Lú Olo "gava" loos Primeiru-Ministru, Taur Matan Ruak, tanba konsege satan virus corona iha Timor-Leste.
Lú Olo dehan, ohin, liu tiha loron 60 ho estadu emerjénsia, haree katak luta atu hasees-an no kontrola virus korona, no atu hadi’ak kondisaun tratamentu, hatudu dadaun ona rezultadu di’ ak, iha nível nasional; no nune’ e, sei hala’o nafatin luta ne’e maibé hamenus dadaun ona medida sira, biar ida-idak tenke matan-moris liután no haktuir nafatin rekomendasaun fase liman beibeik, uza máskara no halo distánsia sosiál.
“Tanba ne’e duni, ha’ u fó parabéns ba ita-nia Povu; ha’u hato’o saudasaun espesiál ba Señór Primeiru-Ministru, ba ilustre deputadu sira, ba profisionál sira iha liña oin, ba konfisaun relijioza sira no sira-nia lideransa sira no mós ba sosiedade sivíl,” Lú Olo hateten liu husi nia diskursu molok fó tomada posse la’ós ba membru governu sira ne’ebé pendente desde Juñu 2018, maibé ba membru governu foun 8 ne’ebé balun mai husi partidu FRETILIN iha Palásiu Prezidensial Ai-Tarak Laran Dili, Sesta 29 Maiu 2020.
Prezidente Repúblika no Prezidente Partidu FRETILIN ne’e hatutan, nu’udar rezultadu husi Covid-19 hada’et husi ema ba ema, nasaun barak iha mundu, boot ka ki’ik, riku ka kiak tama ona iha faze resesaun. Iha mundu tomak, kompañia barak taka no ema barak tebes mak lakon serbisu.
Faktu hatudu, governu atual ne’ebé lidera husi Primeiru-Ministru, Jeneral Taur Matan Ruak hatudu momoos politika bosok malorek ba nia sidadaun rasik kona-bá subsidiu osan dolar amerikanu atus ida ($100) ne’ebé to’o oras ne’e seidauk sai realidade maske Estadu emerjénsia ne’e tama ona ba dala tolu.
