DILI (TOP) – Estadu emerjénsia ne’ebé dekreta ona husi Prezidente Repúblika (PR), Francisco Guterres “Lú Olo” hahu ohin, sei remata iha loron 26 Juñu tinan ida ne’e.
Governu liu husi reuniaun Konsellu Ministru sira iha Segunda liuba, desidi hanaruk tan Estadu emerjénsia ho rajaun númeru kazu positivu ba moras virus corona aumenta maka’as ona iha nasaun viziñu Indonézia, liliu iha provinsia Nusa Tenggara Timur (NTT).
Liu tiha ida ne’e, deputadu sira iha Parlamentu Nasionál halo aprovasaun ba Estadu emerjénsia ne’e ho votu afávor 40, kontra ida husi deputadu Partidu Demokrátiku António da Conceição “Kalohan”, no deputadu hamutuk nain 24 husi CNRT no UDT/FM la tama (auzente).
Ho rezultadu votu afavór ne’e, ikus mai fó autorizasaun ba PR Lú Olo hodi anunsia Estadu emerjénsia ne’e ba datolu ne’ebé hahu ohin no sei hotu iha loron 26 Juñu tinan ida ne’e. Estadu emerjénsia ne’e sei suspende direitu tolu mak sirkulasaun internasional, liberdade sirkulasaun no hili hela-fatin iha territóriu nasionál, inklui direitu ba rezisténsia.
Suspensaun ba direitu tolu ne’e, PR Lú Olo deklara Estadu emerjénsia tuir nia kompetensia rasik ne’ebé hatuur ona iha Konstituisaun RDTL iha artigu 85 alínea g) katak, PR iha kompetensia atu Deklara estadu serku nian ka estadu emerjénsia, tuir Parlamentu Nasionál haruka, wainhira rona tiha ona Konsellu-Estadu, Governu no Konsellu Superiór Defeza no Seguransa nian.
Entretantu, Primeiru-Ministru, Taur Matan Ruak katak, Estadu emerjénsia ba datolu ne’e atu evita ema mate iha Timor-Leste, no konsidera ninia medida sira kaman liu ona hodi fó liberdade itoan ba populasaun sira atu hala’o hikas sira nia atividade normal sira.
"Hanesan ita hatene medida konsentrasaun ba buat tolu, fronteira terrestre, intrenasional sirkulasaun no direitu ba rezisténsia, signifika atividade sira seluk sei normaliza fila-fali. Importante medida sira distansiamentu sosial, ijiene saúde baibain tenke kumpre tanba ema moras mak laiha, maibé moras sei iha no besik liu tan ita, liu-liu viziñu Nusa Tengara Timur,” hateten PM Taur ba jornalista iha Parlamentu Nasionál, Kuarta 27 Maiu 2020.
Desijaun ba estensaun Estadu emerjénsia ne’e mosu pro-kontra entre partidu politika sira iha Parlamentu Nasionál hanesan husi bankada CNRT no UD T/FM sira nia hakarak ne’e labele estende tan ona, maibé haforsa de’it liña fronteira sira atu nu ne’e sidadaun sira bele hala'o hikas sira nia atividade normal.
Koronavirus foun (novel coronavirus-Covid 19), ne’ebé deteta ba dala-uluk iha fulan-dezembru tinan 2019, iha sidade Xineza Wuhan, infeta ona ema millaun 5,4 resin iha mundu tomak no hamate ona ema millaun 300 resin.
Lista Estadu emerjénsia sira iha Timor-Leste:
- Estadu emerjénsia dahuluk akontese iha loron Sábadu, 27 Marsu, remata iha loron Domingu, 26 Abril 2020.
- Daruak akontese iha loron Segunda, 27 Abril no remata iha loron Kuarta 27 Maiu 2020.
- Datolu hahu iha loron Kinta 28 Maiu no sei remata iha loron Sesta, 26 Juñu 2020.
