AMBENO (TOP) – Filosofia Prezidente Autoridade ba Rejiaun Administrativa Espesial Oe- Kusi Ambeno (RAEOA) Arsenio Paixão Bano durante fulan 6 nia laran repete hela de’it lia-fuan nia atu servi ba ema nain rihun 85 iha Oe-Kusi Ambeno, no “Timor la depende ba ema ida, Timor tenke ba oin”, maibé prátika, no meius ne’ebé atu justifika nia lia-fuan ne’e kontrariu tebes.
Ijemplu ki’ik ida maka ema hamutuk nain 198 to’o oras ne’e seidauk simu sira nia salariu, no ezonera profisional saúde sira hamutuk nain 5, nain 4 husi partidu CNRT no nain ida husi FRETILIN. Ema hirak ne’e partense ba ema hamutuk nain rihun 85 iha Oe-Kusi Ambeno ne’ebé Bano durante ne’e iha ambisaun maka’as atu servi sira.
Pessoal cleaner service hamutuk nain 198 husi kompañia Cleaner Service Unip. Lda, ne’ebé hala’o serbisu iha área saúde Oe-Kusi Ambeno desde fulan Dezembru 2020 to’o Janeiru 2021 seidauk simu sira nia salariu, tanba autoridade seidauk halo pagamentu ba empreza ne’e.
Diretor kompañia Cleaner Service Agustinho Timo hateten, bainhira sira-nia salariu atraza iha fulan Dezembru tinan kotuk, 2020 sira direitamente ba konsulta iha Sekretário Rejional Finansas dalarua tutuir malu, maibé la hetan rezultadu di’ak, tanba parte finansas fó razaun katak autoridade sei la permite atu halo pagamentu liu husi invoice, presija ajusta ba sistema free balance.
Timo esplika, resposta ne’e diferente ho fulan Janeiru 2021 nian bainhira nia kontinua ba konfirma tan hetan fali resposta oin seluk katak finansas seidauk bele selu, tanba seidauk iha kontratu entre kompañia ho autoridade.
“Salariu atraza fulan rua ona, primeiru iha Dezembru 2020 sira dehan atraza tanba invoice to’o ohin loron seidauk iha solusaun husi finansas. Sira dehan sei uza fali sistema foun free balance no dehan sira sei hein fali governu sentral sei mai monta fali iha komputador sira ne’ebé autoridade uza hodi muda fali ba sistema online nian maka foin selu,” hateten Timo ba The Oe-Kusi Post iha Oe-Kusi Ambeno, Kuarta 11 Fevereiru 2021.
“Kona-ba fulan Janeiru nian ami labele halo buat ida tanba bazeia ba kontratu ka amandamen ne’ebé to’o ohin loron husi autoridade seidauk fó mai ba kompañia, nune’e ami bele submete ami nia invoice pagamentu kona-ba traballador sira nia salariu,” nia esplika.
Sekretáriu Rejional Saúde Manuel da Costa. Foto TOP.
Hatan ba kestaun ne’e, Sekretáriu Rejional Saúde Manuel da Costa rekoñese cleaner sira barak maka sedauk simu sira-nia direitu salariu fulan rua nian, maibé nia promete sei esforsu atu buka solusaun.
“Ha’u hanoin kestaun ida ne’e ami sei koordena ho finansas atu aselera prosesu ba kontratu foun nian tanba antes ne’e ita halo ona kontratu ba tinan 3 nian, maibé iha Dezembru tinan kotuk remata tiha ona entaun persija extende tan kontratu ba fulan 6 tan, maibé autoridade seidauk prosesa kontratu ne’e, ita espera iha tempu badak bele hetan ona despaisu ba kontratu foun nian,” nia esplika.
Author:Raimundos OkiWebsite:https://www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
