Povu Fatululik rejeita programa Cesta Bázika

FATULULIK (TOP) – Komunidade sira iha postu administrativu Fatululik, munisipiu Kovalima kuaje maioria lakohi simu (rejeita) programa Cesta Bázika, tanba folin ai-han sira la to’o ka la balansu ho osan $25.

Kona-ba kestaun ne’e, administrador postu Fatululik Elias da Cruz katak nia la bele obriga komunidade sira atu simu ai-han sira ne’e.

“Hakarak hato’o de’it antes ne’e ami husi parte programa governu ha’u esplika uluk ha’u nia kna’ar ami ne’e ezekuta de’it programa governu iha baze. Sasan hirak ne’ebé kompanñia lori mai ne’e ohin hatudu iha ne’eba komuniadae la satisfaz ho presu ne’ebé iha. Nune’e, fila-fali ba komunidade atu simu ka la’e, ami la bele obriga komunidade atu simu, no ami mós la impede komunidade nia direitu karik iha seluk atu simu ami nia knaar maka ne’e ami apoiu programa governu mai to’o iha ne’e. Ba presu, kompañia nain esplika iha ne’eba mós komunidade sira la satisfaz ho presu ne’ebé maka iha,” hateten Elias da Cruz ba The Oe-Kusi Post iha Fatululik, Kovalima Kinta 17 Dezembru 2020.

Iha fatin hanesan, reprezentante komunidade postu Fatululik Armando Amaral husu ba Komisaun Anti Korupsaun no Provedoria ba Direitu Humanu no Justisa (PDHJ) tenke halo intervensaun ba programa ne’e iha Fatululik, tanba iha indikasaun korupsaun maka’as no viola povu nia direitu.

“Laiha Estadu rua fahe sasan lahanesan, no labele halo diskriminasaun ba povu. Distribuisaun ne’e tenke iha balansu,” lamenta no protesta Armando Amaral.

“Buat hotu fa’an iha loja nia folin lahanesan ho saida maka kompañia mai fahe iha ne’e. Tanba ne’e KAK no PDHJ tenke halo intervensaun,” Armando bolu atensaun ba KAK no PDHJ tenke tun ba Fatululik hodi hare ba stiasaun ne’e.

Kona-ba problema ne’e, TOP halo ona esforsu konfirma ho diretor kompaña All husi Munisipio Bobonaro Alberto Barreto ne’ebé responsavel fahe ai-han Cesta Báziku iha postu Fatululik katak, ne’e nu’udar fallansu tekniku, la’os korupsaun.





Jornalista TOP kontinua esforsu hodi hetan tan informasaun klean husi diretor kompañia ne’e, maibé lakonsege tanba moras ataka derepente diretor ne’e to’o desmaia kedas iha jornalista nia oin.

Povu iha fatin barak hatudu ona reasaun kontra programa Cesta Bázika, maibé governante sira sempre dehan programa ne'e di'ak hodi motiva liutan to'os nain sira atu kuda barak liutan maske mosu alegasaun ai-han balun importa fali husi nasaun viziñu Indonézia, no a'at liutan povu sira iha suku Comoro tenke simu ai-han fuhuk husi empreza ne'ebé distribui ai-han ne'e foin lalais. Antes ne'e mós mosu ona reasaun kontra husi povu sira iha Vikéké hodi sunu tiha ai-han balun, tanba nafatin diskorda ho folin ne'ebé laiha balansu ho folin iha merkadu. 

Raimundos Oki
Author: Raimundos OkiWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Xefe Redasaun & Editor

PUBLISIDADE