Xanana husu mate-restu 12 Novembru tenke hamrik ona defende konstituisaun

RAILULI (TOP) – Ohin Timor-Leste komemora tan loron masakre Santa Cruz ba dala 29 iha instabilidade politika nia laran.

Iha tinan 29 liuba juventude loriku aswain kuaje 250 mak tenke lakon sira iha moris, tanba oho husi militar Indonézia iha semitériu Santa Cruz. Loron masakre ne’e akontese iha loron 12 Novembru 1991, no ohin 12 Novembru 2020 kompleta ona ba tinan 29.

Lider Karismátiku Kay Rala Xanana Gusmão katak, masakre Santa Cruz ne’e la’os akontese spontanea de’it, maibé planeadu ona hodi hasoru vizita delegasaun Parlamentar Portugues ne’ebé ikus mai kanseladu, tanba governu Indonézia maka lakohi atu jornalista Jill Jollife tama iha delegasaun ne’e.

Mensajen ne’ebé Kay Rala Xanana Gusmão hato’o ba mate restu 12 Novembru ba tinan ida ne’e maka tenke hanoin ona, tenke hamrik ona hodi defende konstituisaun RDTL ne’ebé oras ne’e hetan violasaun maka’as ona.



 

“Ba joven sira hotu ne’ebé partisipa iha 12 Novembru 1991, ha’u husu boot atu imi hotu hanoin nune’e, ita la terus iha 12 Novembru, maluk sira la mate iha 12 Novembru para ita ukun aan tiha bele viola konstituisaun, bele viola lei, bele viola norma sira hodi ita nia Estadu Direitu Demokrátiku ne’ebé ita funu ba, fó ita nia vida ba ne’e sai la vale tiha de’it,” Xanana hato’o mensajen iha Railuli, Leorema, postu administrativu Bazartete, munisipiu Likisa Kuarta 11 Novembru 2020.

“Hamrik to’ok ba, hanoin to’ok ba. Hanoin to’ok ba sa valor maka ita atu fó ba 12 Novembru bainhira ita momentu ida ne’e ita nonok de’it, hare ba ema viola tun, viola sa’e buat sira ne’e hotu, arbiru de’it,” Xanana afirma.

Raimundos Oki
Author: Raimundos OkiWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Xefe Redasaun & Editor

PUBLISIDADE