SABURAI (TOP) – Roman ahi eletrisidade ne’ebé lakan maka’as husi Kewar (Indonézia) ne’ebé tirus borus foho Mali-Toli nia husar klaran halo populasaun sira iha suku Saburai sente “laran moras” tebes, tanba to’o oras ne’e seidauk hetan asesu ba enerjia eletrisidade.
Komunidade sira espresa sai sira nia difikuldade katak, molok tam aba Estadu Emerjensia sira sei bele asesu mina-rai husi área fronteira hodi uja ba sunu iha tempu kalan, maibé durante fulan tolu ba kotuk to’o oras ne’e difisil tebes ba sira hodi hetan mina-rai, tanba fronteira taka metin tebes, tanba problema surtu virus corona (Covid-19) ne’e.
“Antes ne’e ami uja mina-rai, maibé agora ami sunu kamii de’it mak sunu iha tempu kalan. Fronteira taka metin, ami bele halo buat ida,” hateten komunidade Julianos dos Santos ba The Oe-Kusi Post (TOP) iha sede suku Saburai, postu Maliana, munisipiu Bobonaro, Sábadu 25 Jullu 2020.
Suku Saburai ne’ebé lokaliza iha foho Mali-Tolu nia hun, loron-kalan mak hare de’it roman eletrisidade no estrada ida kaber tebes iha nasaun viziñu Indonézia, maibé kondisaun estrada, bee moos, no eletrisidade sai problema boot ba suku ne’e ho total abitantes 2679.
Iha fatin hanesan, xefe suku Saburai, Vicente dos Santos hateten, durante tinan barak ona suku ne’e hasoru problema barak tebes, maibé seidauk hetan intervensaun másimu husi governu.
“Ami nia estrada la di’ak, bee moos laiha no ami nia ahi eletrisidade mós laiha. Avo Nana la’os membru governu, maibé ami hanesan hato’o de’it ami nia difikuldade sira,” hato’o xefe suku Saburai ba Kay Rala Xanana Gusmão bainhira hala’o asaun karidade iha suku ne’e Sábadu 25 Jullu 2020.
Hatan ba preokupasaun sira ne’e, Kay Rala Xanana Gusmão katak oras ne’e nia labele halo buat ida, tanba nia nu’udar sidadaun baibain no dezempregu hela, maibé Xanana dehan nia rejista hela assuntu ne’e.
Xanana hatutan, la’os iha suku Saburia de’it mak seidauk asesu ba enerjia eletrisidade, maibé iha fatin balun mós ahi seidauk tama, tanba kauza husi “veteranu sira mak hadau malu” ba projetu ne’e.
