IRARA (TOP) – Molok eis Komandante em chefe das FALINTIL, Kay Rala Xanana Gusmão hakat ba Mehara hodi reorganiza gerillia, ba dala uluk nia han hamutuk ho inan doben nain rua, Arminda dos Santos no Joanina Marques iha tinan 1980.
Xanana konsege hasoru hikas labarik feto nain-rua ne’ebé mós ferik ona iha aldeia Irara, suku Fuiloro, Lautein iha loron Sábadu 27 Juñu 2020.
Veteranu Renan Selak haktuir istoria ne’e katak iha tinan 1980, molok Xanana atu hakat liuba área sentral, nia han hamutuk ho labarik feto nain-rua ne’e iha tempu ne’eba.
“Maun kuandu sai husi ne’e ba sentru sei hasoru risku boot ba ita nia moris entre mate no moris, no inan-feton nain-rua ne’ebé hela mós bele mate. Se Maromak tulun ita mak ita moris nafatin, ita sei bele hasoru malu bainhira funu ne’e remata,” veteranu Renan Selak hasara hikas mensajen Xanana nian ba labarik feto nain-rua iha tinan 40 liuba.
“Tanba ne’e mak ohin ita nia alin feto nain-rua ne’e mai hatudu fali marmeta ne’ebé sira han hamutuk ho maun Xanana iha tempu ne’eba. Sira entrega marmeta ne’e hodi bele tau ba iha muzeu,” esplika Renan.
Iha fatin hanesan, Xanana katak, liu tiha tinan 40 ona mak foin hasoru malu ho labarik feto nain-rua ne’ebé oras ne’e mós idade aumenta ba ferik dadauk ona.
“Agradese ba Maromak no rai-lulik hodi sei kontinua moris to’o ohin loron. Iha tinan 1976, ferik-katuas sira lori sira nia sasan balun de’it halai sa’e ba foho Matebian, terus tebes. To’o iha Matebian ne’eba hahan laiha. Tun fali mai villa, inimigu kontinua kastigu no tortura sira to’o balun mate tan iha vila laran,” Xanana haktuir hikas lala’ok gerilla iha tinan 40 liuba.
Xanana rekoñese komandante mesak didi’ak de’it no barak mak mai husi Irara, balun sei moris, no balun mate tiha ona.
“Tanba ne’e mak ha’u husu ba joven sira iha Irara tenke komporta di’ak hodi fó onra ba fetik-katuas sira nia sakrifisiu, sira nia terus no susar mak ohin loron imi moris di’ak iha era independensia,” Xanana husu ba joven sira atu labele involve aan iha grupu oioin hodi labele estraga malu to’o oho malu, maibé tenke kari domin no kuda dame hodi hametin liutan estabilidade nasionál.
