Xanana vizita abrigu Daitula ba dala uluk

Eis Komandante em Chefe das FALINTIL, Kay Rala Xanana Gusmão vizita abrigu saudozu Komandante David Alex Daitula iha Darasula, Baukau Sesta 26 Juñu 2020. Foto The Oe-Kusi Post/Raimundos Oki.

DARASULA – Eis Komandante em Chefe das FALINTIL, Kay Rala Xanana Gusmão durante ne’e la’ós hala’o de’it asaun tulun susar nain sira iha rai-laran, maibé fahe nia tempu mós hodi vizita abrigu saudozu komandante David Alex Daitula.

Responsavel Kaixa Postal, Helder Guterres da Silva hatete, fatin subar ne’e (abrigu) ne’e halo iha tinan 1994, no saudozu komandante Daitula sempre subar iha fatin ne’e hodi organiza funu durante tempu rezistensia.

“Fatin ne’e nia sempre subar iha ne’e hodi organiza funu durante tempu rezistensia. Foin lalais ami hetan suporta husi Museu de Rezistensia, maibé osan la to’o, tanba ne’e mak ami husu ba maun boot bele apoiu ne’e ami,” hateten Helder ba jornalista sira iha aldeia Darasula, suku Gariuai postu Vemase, munisipiu Baukau Sesta 26 Juñu 2020.

Helder Guterres da Silva

Nia hatutan, durante tempu rezistensia ema itoan de’it mak suporta saudozu David Alex Daitula iha abrigu ne’e molok inimigu ka’er nia iha tasi ibun parte Kaibada, Baukau.

Kona-bá kestaun ne’e, Xanana husu ba Darasula oan sira tenke hahu ona hakerek istoria sira ne’e hodi nune’e bele sai nain ba istoria funu ne’e rasik.

“Labele husik ema husi rai-liur mai mak hakerek rohan de’it depois konta fali ba ita. Imi nia tugas ida mak ne’e tenke hahu hakerek ona,” apela Xanana ba joven Darasula hodi hahu ona konserva fatin istoriku sira ne’e.

Iha oportunidade ne’e mós Xanana katak, nia prezensa iha fatin ne’e atu hare besik liutan grupu vulnerabel sira ne’ebé hasoru susar boot durante tempu Estadu emerjensia.

Xanana mós promete ona ba joven sira iha fatin ne’e katak depois fila ba Dili, nia sei halo esforsu hodi responde ba sira nia pedidiu kona-bá fasilidade muzika nian atu nune’e bele anima komunidade sira iha fatin ne’e.

“Maibé, imi tenke konserva fatin ne’e ho di’ak hodi bele sai nu’udar fatin turizmu komunitária iha tempu oin mai,” Xanana ezije ba joven sira tenke hahu hanoin kreativu ona hodi hakerek istoria sira ne’e atu nune’e bainhira turista lokal no estranjeiru sira vizita fatin ne’e sira bele le’e istoria sira kona-bá luta nian.

Raimundos Oki
Author: Raimundos OkiWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Xefe Redasaun & Editor

PUBLISIDADE