Karidade nu’udar sasukat “sa’e ba lalehan”

Kay Rala Xanana Gusmão hato'o nia intervensaun molok fahe nesesidade báziku ba familia kbi'it la'ek sira iha Hauba, postu Bobonaro, munisipiu Bobonaro, Segunda 15 Juñu 2020. Foto The Oe-Kusi Post/Raimundos Oki

MALIANA (TOP) – Dutrina igreja katolika iha mundu tomak inklui mós iha Timor-Leste fiar ba karidade nu’udar dalan ida atu bele “sa’e ba hasoru Aman Maromak” iha leten aas ba.

Padre no madre sira sempre hanorin sarani sira atu tulun malu iha tempu saida de’it, tempu di’ak no tempu aat.

Asaun tulun malu (halo karidade) nu’udar asaun umanizmu ne’ebé igreja katolika sempre komunga metin.

Dalan atu ba to’o Roma wain tebes hanesan mós dalan atu “sa’e ba lalehan”. Halo orasaun, badinas ba misa, fó perdaun ba malu, halo asaun karidade hodi tulun malu, no respeita malu nu’udar meius sira apropriadu hodi kumpre Maromak nia hakarak.

Bispo Diocese Maliana, Dom Noberto do Amaral nafatin husu ba sidadaun sira ne’ebé fiar ba iha Jesus Cristo no Na’i Feto Maria Virjen atu halo karidade hodi tulun maluk sira ne’ebé presija tebes iha situasaun difisil.

“Halo karidade ne’e nu’udar dalan ida sa’e ba lalehan,” hateten Dom Norberto ba jornalista sira iha nia rezidensia Maliana, Tersa 16 Juñu 2020.

Dom Norberto mós apresia no agradese tebes ba asaun karidade husi Timor oan sira, no Kay Rala Xanana Gusmão ne’ebé hala’o ona iha munisipiu barak.

“Maibé, ha’u husu atu labele politiza asaun karidade ne’ebé halo ona husi Xanana Gusmão iha fatin barak,” Dom Norberto afirma.

Observasaun The Oe-Kusi Post (TOP), durante fahe nesesidade báziku ba familia kbi’it la’ek sira iha Leorema (Likisa), Letefoho (Ermera), Atara-Atsabe (Ermera), Hauba, Bobonaro, Tunubibi, no Atabae, Xanana sempre dehan, nia la lori buat ida, tanba sasan sira ne’e apoiu husi emprezariu Timoroan sira.

“Ha’u mai lalori buat ida. Ha’u agradese katak ita sei iha Timoroan barak mak laran di’ak hodi fó tulun malu iha situasaun difisil ne’e,” Xanana esplika.

Prosesu fahe nesesidade báziku iha munisipiu tolu (3), Likisa, Ermera no Bobonaro ne’e hetan partisipasaun maka’as husi sidadaun sira, no maske asaun karidade ne’e ba de’it familia kbi’it la’ek sira, maibé ema mai barak tebes hanesan loos iha tempu kampaña politika.

Xanana sempre klarifika, nia prezensa iha munisipiu hirak ne’e la’ós atu halo kampaña, maibé atu fahe nesesidade báziku ba familia kbi’it la’ek sira.

Raimundos Oki
Author: Raimundos OkiWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Xefe Redasaun & Editor

PUBLISIDADE