DILI (TOP) – Konsellu Imprensa (KI) Timor-Leste ne’ebé hetan apoiu husi Programa Nasões Unidas ba Dezenvolvimentu (PNUD), no mós KOICA lansa tiha ona matadalan ida ba jornalista Timoroan sira kona-bá oinsa halo reportajen durante surtu virus corona (Covid-19) iha Timor-Leste.
Matadalan hamutuk 800 ne’e atu fornese informasaun prátika sira ba jornalista sira ne’ebé hala’o kobertura ba Covid-19 iha rai-laran.
Diretora adjuntu PNUD, Lazima Onta-Bhatta, no Prezidente Konsellu Nasional Imprensa, Virgilio Guterres, foka importânsia mídia ne'ebé livre no profissional ezerse papel vital iha luta kontra pandemia Covid-19.
Antes ne’e, iha loron Segunda 11 Maiu liuba, iha ona sorumutu entre KI ho PNUD deskuti kona-bá pedidu husi KI ba lansamentu matadalan ne’e.
Prezidente KI konsidera matadalan ne’e nu’udar regra moral no konduta hahalok nian ba jornalista no meu komunikasaun sira atu la’o-tuir bainhira hala’o atividade jornalístika no halo publikasaun notísia kona-ba asuntu Covid-19.
“Matadalan Reportajen ba COVID – 19 foti valor no prinsípiu sira ne’ebé Kódigu Étika Jornalístika opta. Pur ezemplu, notísia tenke cover both sides no jornalista tenke halo verifikasaun ba informasaun hotu-hotu no nia fonte sira antes publika,” hateten Prezidente KI, Virgilio Guterres ne’ebé sita iha site KI.
Nia mós husu ba jornalista no meu komunikasaun hotu-hotu atu hala’o ninia papél informativu no edukativu ho loloos hodi labele produz no públika notísia sira ne’ebé nia konteúdu sensasionál no hamosu pániku iha sosiedade nia leet.
“Jornalista ho mídia iha atu ajuda redús pániku, la’ós atu aumenta situasaun sai pániku-liu tan. Kuandu mídia mós hamosu notísia sira ne’ebé sensasionál no espekulativu, ida-ne’e sei halo povu la hakmatek,” nia afirma.
Nia fó ijemplu iha notísia ida dehan, posibilidade ema ne’ebé infetadu pozitivu virus korona sei aumenta ka metade husi populasaun sei infetadu.
“Ida-ne’e mak notísia ne’ebé nia konteúdu ne’e sensasionál no espekulativu,” nia esplika.
Molok hakotu, nia agradese ba Programa Nasões Unidas ba Dezenvolvimentu (PNUD), no Governu Koreanu ne’ebé kontinua fó sira nia apoiu hodi fasilita produsaun Matadalan Reportajen Covid-19. Nia mós agradese AJTL no TLPU ne’ebé sai ona parseiru di’ak durante ne’e hodi luta no defende nafatin liberdade imprensa no liberdade espresaun iha Timor-Leste, liuliu iha kontestu propagasaun Covid-19.
Entretantu, Jestór Electoral Project LEARN, Tito Filipe katak sira iha serbisu ida di’ak tebes ho KI, AJTL no mós asosiasaun jornalista sira seluk hodi kontribui ba hametin serbisu jornalizmu nian iha Timor-Leste.
Eis journalist RTTL ne’e hatutan, UNDP iha komitmentu boot atu apoiu nafatin asosiasaun jornalista sira, inklui Konsellu Imprensa nune’e iha futuru bele hametin liutan profesionalízmu jornalista sira nian.
Quinta, 14 Mai 2020 22:49
711.8 KB
1.178
