DILI (TOP) – Dezde 2019 Campus Globál Direitus Umanus ajuda UNTL atu dezenvolve edukasaun direitus umanus no peskiza ho estabelesimentu husi Sentru Direitus Umanus ho apoiu husi Uniaun Europeia.
Tuir komunikadu ba imprensa ne’ebé The Oe-Kusi Post (TOP) asesu husi Sentru Direitus Umanus UNTL katak, instalasaun Sentru Direitus Umanus UNTL inaugura iha Agostu ikus iha serimónia ida ne'ebé furak hanesan parte hosi ajenda nasionál kona-ba komemorasaun ba selebrasaun aniversáriu tinan 20 husi konsulta públika, ho prezensa husi José Ramos-Horta no Ministru Longuinhos dos Santos, hamutuk ho ofisiál senior sira husi Estadu no dignatáriu internasionál sira.
Objetivu hosi Sentru ne'e atu habelar direitus umanus hosi 2021 liu husi Fakuldade UNTL sia hotu hanesan matéria transversál, no atu envolve iha rede internasionál no atividade peskiza atu sai membru husi Campus Globál Ázia-Pasífiku hamutuk ho universidade seluk husi ASEAN. Tanba razaun ida-ne'e, ita daudaun fó formasaun ho susesu ba profesór, investigadór, no funsionáriu sira atu sai rekursu futuru Sentru nian.
Ida ne'e mak projetu ambisiozu tebes ida ne'ebé ita dezenvolve hela iha kooperasaun ho parte interesada lokál no rejionál, liu-liu ho PDHJ no Sentru Nacional Chega! Tuir loloos, projetu ne'e mosu tuir rekomendasaun pos-CAVR, atu dezenvolve materiál, kuríkulu no rekursu edukasaun seluk relasiona ho direitus umanus no dixiplina seluk ne'ebé relevante, no mós prinsípiu sira husi Deklarasaun Direitus Umanus ASEAN nian.
Projetu ne'e agora iha faze ikus nia no iha ona rezultadu importante, rezultadu husi serbisu maka’as tebes, koordenasaun di'ak tebetebes entre parte sira no tradisaun, prátika, no ezijénsia husi direitus umanus iha Timor-Leste.
“Ho karta ida ne'e ami ho orgullu tebes hakarak atu fó hatene ba ita boot katak iha loron 15 fulan-Juñu Uniaun Europeia hili projetu ida ne’e hosi projetu barak seluk atu sai istória susesu ba relatóriu Kona-ba Direitus Umanus no Demokrasia iha 2019 husi Uniaun Europeia!”.
“Ida-ne'e susesu importante ba Campus Globál no ba UNTL no ita hotu tenke sente kontente no hetan inspirasaun. Espera, ida-ne’e sei mós fasilita sustentabilidade ba instituisaun foun ida ne’e iha Timor-Leste husi 2021 ba oin”.
