dalan sanak rua/ha'u hili dalan ida/nakonu ho ai-tarak no rai-kuak/iha kalan nakukun/
ha'u fiar metin atu la'o iha dalan ne'e tanba ha'u kaer lilin lolon ida/
ha'u fiar katak ha'u sei la monu arbiru/hodi duni tuir ha'u-nia mehi loron-aban nabilan//
--
Fatuhada,30 Agostu 2017
@JE/ABS/KM
REFERENDU 30 AGOSTU 1999: VOX POPULI, VOX DEI
Referendu: nu’udar otas no biban
ba ita Timoroan sira
atu kore ita-nia an
hosi nakukun tinan lubun nian
ne’ebé falun metin
Referendu: nu’udar otas no biban
ba ita Timoroan sira
atu simu loro-matan nabilan
ukun rasik-an nian
ne’ebé ita hein tebes duni iha tinan wa’in
REFERENDU: VOX POPULI, VOX DEI!
***
Fatuhada, Dili, 30-31 Agostu 2021
JE/ABS/KM
SETEMBRU 1999: SETEMBRU METAN NAKUKUN
bandeira liberdade ita dada-sa’e aas/ ba leten/
ahi suhar metan hadulas sidade/
ema lubun halai namkari/
lalehan nakukun/sasin/ moris foun ita sosa ho raan/
ho ruin namlekar/
iha pájina istória nian/
ita hakerek dala ida tan/
ho letra boot:
MATE KA MORIS, UKUN RASIK-AN
--
Fatuhada, 4-5 Setembru 2021
@JE/ABS/KM
SUAI DEBUS HALERIK: MEMÓRIA SETEMBRO NEGRO 1999
Suai Debus halerik/
Suai Debus halerik/
Suai Debus hakerek, ho raan,
Hakilar LIBERDADE
--
Fatuhada, 6 Setembru 2021
@JE/ABS/KM
