DILI (TOP) – Lider Karismátiku, Kay Rala Xanana Gusmão lamenta, no kondena tebes atitude oknum Polisia Nasionál Timor-Leste ne’ebé lori arma hodi tiru mate veteranu ida ho nia oan iha Lahane.
Xanana hato’o preokupasaun ne’e durante hala’o vizita ba haree familia matebian sira iha aldeia Ainitas-Hun, suku Lahane, Muninisipiu Dili iha loron Sábadu 05 Juñu 2021.
“Halo nusa maka nia hela iha karaik, nia sai fali mai uma ne’e tiru sira na’in rua, ne’e tenki halo investigasaun didi’ak atu evita buat sira ne’e labele akontese bebeik,” katak Xanana durante konversa ho familia matebian sira iha aldeia Ainitas-Hun, suku Lahane, Muninisipiu Dili iha loron Sábadu 05 Juñu 2021.
Saudozu Mateus de Deus "Amino"./Net.
Xanana preokupa, tanba atitude oknum polisia ho inisiál M la profisionál no la merese atu uza arma hakanek povu iha nasaun ne’e.
Matebian veteranu rezistensia Mateus de Deus "Amino" hetan tiru ho pistola glock-19 bala musan kona borus ba hirus matan no matebian Camilio da Conceiçao de Deus hetan tiru kona kabun hodi rezulta nia mós mate, enkuandu joven ida sofre kanek toda.
Dadaun ne’e mate isin vitima na’in rua mediku lori ona ba fatin mortuariu hodi hein transporte ba nia rezidensia Lalane, no vitima na’in ida seluk kanek iha ain to’o oras ne’e sei simu hela tratamentu iha sala emerjensia HNGV.
Familia vitima Francisco Borges katak, saida maka akontese ne’e lamentavel tebes.
Vitima Camilio de Deus nia iis kotu iha sala emerjensia HNGV iha loron Sábadu dadersan 05 Juñu 2021. Foto TOP/Raimundos Oki
“Saida maka akontese ne’e ita lamentave tebes ho membru PNTL ne’ebé maka uja arma ne’ebé atu proteze nia povu maibé fila uja oho fali nia povu rasik,” katak Borges ba The Oe-Kusi Post iha sala mortuariu HNGV, Dili, Sábadu 05 Juñu 2021.
Nia konta kronolojia katak, kazu asasinatu ne’e akontese iha Lahane iha Sesta 04 Juñu 2021 oras tuku ida kalan boot, membru polisia ida uja farda kompletu ba tiru komunidade sira iha sira nia uma.
“Mateus de Deus ne’e mate fatin, tanba kilat musan kona iha hirus matan ho nia oan mane Camilo mai to’o hospital la konsege, nia mós mate tan ona,” esplika Borges.
Nia dehan, iha familia ida iha ema nain rua, aman ho oan maka mate dala ida. No vitima ida seluk maka hetan tiru iha ain ne’ebé oras ne’e sei hetan hela tratamentu intensivu iha HNGV.
“Ita lamenta tebes ho attitude ne’e, asaun premanizmu, brutalizmu husi oknum PNTL ne’ebė uja farda nasaun ninian, uja nasaun nia kilat lori oho fali povu”.
Borges mós ezije ba komandu jeral PNTL no nain ba asaun penal tenke fó pena todan ba oknum polisia ne’e, tanba tiru mate ona ema nain rua ho povu nia kilat rasik.
Felly de Deus nu’udar oan-feto husi saudozu Mateus de Deus ho tanis lian maka’as iha sala mortuariu HNGV katak, nia aman mate tanba tiru husi oknum PNTL iha Lahane, Dili iha Sesta kalan 03 Juñu 2021 oras tuku ida.
Tuir informasaun ne’ebé TOP asesu katak, membru polisia ne’ebé tiru mate ema nain rua ne’e deskonfia ho naran Mariano de Jesus ho deviza Ajente Xefe husi munisipiu Dili, postu administrativu Vera Cruz, hela iha Lahane Ocidental, moris iha loron 21 Marsu 1974 ho númeru ID Polisia maka 11862, númeru kilat FHX 093, modelu Glock 19, estadu sivil kaben nain.
Saudozu Amino./Net.
TOP kontaktu ona portavoz komandu jeral PNTL, Superintendente Xefe Arnaldo de Araújo maibé, dehan to’o oras ne’e nia seidauk iha dadus kompletu kona-ba kazu asasinatu ne’e.
Author:Raimundos OkiWebsite:https://www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
