DILI (TOP) – Lider Istoriku, Kay Rala Xanana Gusmão akompana hosi Dotora Virna no dotor Rogerio Pedro Sam inaugurasaun Klinika V&S MediC ne'ebé hetan bensaun husi padrePlínio Martins, SJ.
Klinika ne'e ofisilamente loke ona ba públiku nu'udar pasu importante ida fó atendimentu ba hirak ne'ebé presiza asistensia saúde.
Iha nia mensajen, Xanana konsidera ezistensia klinka ne'e la'os fó prioridade de’it ba osan, maibé buka oinsa atu kura moras sira ho domin no laran-luak mak sei lori ema hotu hetan isin di’ak.
Xanana admite katak, bainhira profisionál saúde sira servi ho fuan no domin mak sei kura pasiente sira ho di’ak.
"Ita hotu dezeja fatin ida ne'e ba dotor-dotora sira ne'ebé simu pasiente sira mai konsulta iha ne'e, ita simu nu'udar umanu. La'os mai atu buka hanoin de’it mak simu osan. Maibé, halo esforsu oinsa hanoin buka atu kura ema moras sira. Hadomi ema moras sira mak sei kura ema moras lalais liu, duke imi fó ai-moruk, no trata ema moras sira hanesan imi nia aan rasik. Ida ne'e nu'udar misaun ba dotor ka médiku sira servi ema ne'ebé presiza hetan kura husi moras hodi rekupera lalais hodi fó susesu ba imi nia serbisu," hateten Xanana durante nia diskursu iha seremónia klinika ne’e iha Manleu-Dili, Sesta 6 Maiu 2022.
Entretantu, iha oportunidade murak ne'e, nain ba klinika ne’e, doutora Virna promete sei ka’er metin mensajen Kay Rala Xanana Gusmão nian no fiar sei lori satistifasaun ba ema hotu, liliu ba pasiente sira ne’ebé sei ba konsulta iha fatin ne’e.
