DILI (TOP) – Sekretariu Jeral Partidu FRETILIN, Mari Alkatiri maske oras nia partidu tonka hela governu atual, maibé nia hahu husu ona eis Primeiru-Ministru atual Prezidente Partidu CNRT, Kay Rala Xanana Gusmão maka tenke assume responsabilidade ba númeru kazu mate ba Covid-19 ne’ebé aumenta dadauk ona.
Antes ne’e, iha loron 12 to’o 15 Abril 2021, eis komandante ein xefe das FALINTIL, Kay Rala Xanana Gusmão toba kalan tolu iha estrada Vera Cruz hodi hein mate-isin Armindo Borges ne’ebé iis kotu iha dalan klaran molok to’o fatin izolamentu Vera Cruz.
Xanana nia prejensa iha fatin izolamentu Vera Cruz ne’e atu hadia lala’ok serbisu governu nian liliu ba mekanizmu serbisu Ministériu Saúde nian kona-ba luta prevensaun surtu Covid-19 iha Timor-Leste. Rezultadu toba kalan tolu iha estrada Vera Cruz ne’e ikus mai sidadaun sira ne’ebé mate iha situasaun Covid-19 ne’e la ba halo’ot ona iha semitériu Metinaro hanesan matebian Francisca Gama nian, maibé oras ne’e bele halo’ot ona iha semitériu públiku sira ne’ebé besik iha Dili laran hanesan iha Bekusi no Manleu.
Númeru kazu pozitivu ba moras Covid-19 oras ne’e kontinua aumenta, no fatin barak iha Dili laran governu foti hotu ona hodi halo ba fatin izolamentu. Hafoin rona informasaun katak artista Juga Gama iis kotu iha fatin izolamentu Vera Cruz iha loron Kinta 13 Maiu 2021, no liu oras balun de’it, Alkatiri mós hahu hakerek kedas iha nia konta Facebook hodi husu ba sira ne’ebé antes ne’e loke dalan iha Vera Cruz tenke assume responsabilidade.
“To'o ona tempo atu responsabiliza sira ne’ebé loke dalan iha fatin oi-oin, hahu husi Vera Cruz rasik, ba povu lakon fiar ba sistema kombate COVID-19,” hateten Alkatiri ne’ebé The Oe-Kusi Post (TOP) sita husi nia konta privadu Facebook.
“Ohin de’it sidadaun nain tolu maka husik mundu ida ne'e. Ida maka artista foin sae Ida. Identika ona mos kazu infetadu barak tebes iha komarka Bekora,” Alkatiri afirma.
Ho situasaun ne’e, Alkatiri husu ba Sentru Integradu ba Jestaun Krize (SIJK) atu defini didiak regra ba proteje sira ne’ebé hela iha komarka hotu.
Entretantu, Kordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araújo katak, iha loron Kinta 13 Maiu 2021, rejista ema nain tolu maka mate ho Covid-19 hanesan ida iha fatin izolamentu ba kazu moderadu ho grave iha Vera Cruz. Na'in rua seluk detetadu pozitivu iha loron hirak liubá, maibé rekuza atu baixa iha Vera Cruz, no obriga-an hela deit ka fila ba uma.
Nia dehan, ida iha Likisa no ida iha Kaikoli, Dili. Ida iha Likisa ne’e hakotu-iis iha uma, no aseita halot tuir protokolu Covid-19, no ida Kaikoli, Dili, ne’e hakotu-iis iha dalan ba HNGV. No lakohi halot tuir protokolu Covid-19.
Kazu ativu iha loron Sesta 14 Maiu 2021 hamutu ema nain 1968.
Xanana nia asaun pasifika hodi toba kalan tolu iha rai-rahun laran iha Vera Cruz ikus mai fó rezultadu ne’ebé satisfaz ba parte hotu maka hanesan konsege obriga Estadu atu halo tuir loloos saida maka siensia haruka, katak mate-isin ne’ebé trata ho didi’ak sei la fó ameasa ba ema seluk nia saúde. Dignifika, no lahalo diskriminasaun ba Timoro-an ne’ebé mate atu nune’e halot ho dignu tuir uzu kostume, kultura, no fiar relijiaun nian.
