DILI (TOP) - Prezidente Repúblika, José Ramos-Horta hatete, iha área asaun sosiál no abitasaun, maski la tama iha ambitu Prezidénsia nian, maibé lakohi husik nia konxiénsia hodi fornese resposta konkreta ba situasaun sira ne'ebé iha vulnerabilidade boot liu.
Resposta konkretu ne’ebé Prezidente halo durante ne’e mak konstroi ona uma ka abitasaun sosial hamutuk 39 iha teritóriu nasionál no apoiu sosiál direta ba familia hamutuk 10,747, ema ho difisiensia sira hamutuk 1653, no ema hamutuk nain-17,425 mak hetan ona terapia sosial “Rai Mor”.
Informasaun ne’ebé The Oe-Kusi Post (TOP) asesu iha konta media sosial José Ramos-Horta katak, Palásiu Prezidensia durante ne’e mós apoia ona orfanatu hamutuk 283, mikro-negósiu 90, grupu kulturál 387, estudante 35, no grupu desportu hamutuk 50. Fornese mós serbisu apoiu hamutuk 129 ba vítima sira husi dezastre naturál sira, hodi mobiliza apoiu husi doadór 16.
Iha paralelu, liuhusi programa inkluzaun no empoderamentu feto nian, feto hamutuk na'in-748 hetan ona apoiu iha formasaun no kapasitasaun, bolsa estudu sira hetan ona iha medisina (Indonézia), no subsídiu mikro-negósiu hamutuk 210 (entre $2,500) no subsídiu osan hamutuk 60 (entre $150-200) hetan atribuisaun ba promosaun iha orden sira promosaun nian, autonomia no dignidade iha dezenvolvimentu atividade ekonómika.
Asaun sira-ne'e hetan reforsu ho distribuisaun ekipamentu esensiál sira — hanesan karreta fa'an nian iha dalan (44 Food Carts), fogaun no ekipamentu dapur nian (Emprezáriu 90), kadeira-roda asisténsia 9, veíkulu transporte nian (kamioneta pick up) no veíkulu motorizadu sira (Tiga Roda Vehicles), lap top sira no materiál edukasionál sira seluk — iha konjunsaun ho parseiru internasionál no privadu sira setór, kontribui ba inkluzaun ekonómika no sosiál ba sira ne’ebé vulneravel liu.
“Maibé luta hasoru pobreza la limita de’it ba apoiu materiál. Presiza mós inkluzaun, dignidade, protesaun no oportunidade ba sidadaun hotu-hotu,” hateten Prezidente Horta.
“Ha’u fiar katak igualdade jéneru, respeitu ba diversidade, no inkluzaun sosiál só bele alkansa tomak liuhosi asaun konkreta sira hodi kombate eskluzaun, promove empoderamentu ba sidadaun hotu-hotu no sira-nia família, hodi la husik ema ida iha kotuk,” Prezidente Horta afirma.
Laureadu Nobel ba Paz 1996 ne’e hatutan, imperativu tebes atu hametin luta kontra violénsia doméstika, diskriminasaun, marjinalizasaun, no forma intoleránsia hotu-hotu ne’ebé hafraku sosiedade no harahun dignidade umana. Taxa violénsia doméstika ne’ebé aas, ne’ebé partikularmente afeta sira ne’ebé vulnerável liu—feto no labarik sira—la aseitavel.
“Ema hotu merese protesaun, respeitu, afetu, no apoiu, atu nune’e domin, komprensaun mútua, no kultura dame nian prevalese iha ita-nia família no komunidade sira”.
Nia hatutan, ema sira iha situasaun vulnerabilidade boot liu tenke hetan protesaun husi forma hotu-hotu husi violénsia, abuzu, no eskluzaun ne'ebé kompromete sira nia dezenvolvimentu pesoál, família, no sosiál.
“Sira mós tenke hetan apoiu iha sira nia esforsu empoderamentu liuhusi kriasaun oportunidade sira ne'ebé permite sira atu harii moris ne'ebé dignu, útil, no produtivu, hodi promove sira nia moris-di'ak ekonómiku no sosiál”.
Nia esplika, Prezidénsia la troka Governu, maibé haka’as-an atu komplementa ninia asaun sosiál ne’ebé meritoza, hodi komprende katak luta hasoru pobreza mosu husi ita-nia konxiénsia sarani.
