DILI (TOP) – Parlamentu Nasionál, liu husi Sesaun Plenáriu Ordináriu iha loron 2 Dezembro 2025, Deputadu sira apresia pareser husi Komisaun ba assuntu Konstitusionál no Justisa kona-ba pedidu autorizasaun ba audisaun 𝐃𝐞𝐩𝐮𝐭𝐚𝐝𝐮 𝐅𝐥𝐨𝐫𝐞𝐧𝐭𝐢𝐧𝐨 𝐗𝐢𝐦𝐞𝐧𝐞𝐬 𝐝𝐚 𝐂𝐨𝐬𝐭𝐚 “𝐒𝐢𝐧𝐚 𝐑𝐚𝐢” 𝐧𝐨 𝐃𝐞𝐩𝐮𝐭𝐚𝐝𝐮 𝐀𝐧𝐭𝐨𝐧𝐢𝐧𝐡𝐨 𝐁𝐢𝐚𝐧𝐜𝐨 hodi presta deklarasaun ho kualidade hanesan 𝐬𝐮𝐬𝐩𝐞𝐢𝐭𝐮 𝐢𝐡𝐚 𝐩𝐫𝐨𝐬𝐞𝐬𝐮 𝐢𝐧𝐪𝐮é𝐫𝐢𝐭𝐮 "𝐍𝐔𝐂𝟎𝟎𝟏𝟕/𝟐𝟓.𝐏𝐆𝐆𝐂" ne'ebé la'o iha 𝐆𝐚𝐛𝐢𝐧𝐞𝐭𝐞 𝐒𝐞𝐧𝐭𝐫á𝐥 𝐊𝐨𝐦𝐛𝐚𝐭𝐞 𝐊𝐨𝐫𝐫𝐮𝐩𝐬𝐚𝐮𝐧 𝐧𝐨 𝐊𝐫𝐢𝐦𝐢𝐧𝐚𝐥𝐢𝐝𝐚𝐝𝐞 𝐎𝐫𝐠𝐚𝐧𝐢𝐳𝐚𝐝𝐮 (𝐌𝐢𝐧𝐢𝐬𝐭é𝐫𝐢𝐮 𝐏ú𝐛𝐥𝐢𝐤𝐮). Apresiasaun ne’e termina ho aprovasaun husi plenáriu ba relatóriu no pareser Komisaun nian ho votus a favor 52, kontra 0 no abstensaun 2.
Tuir informasaun ne’ebé The Oe-Kusi Post (TOP) asesu husi Pájina Ofisial (Fan Page) Parlamento Nasionál nian katak, iha períodu antes ordem do dia, Bankada Parlamentar FRETILIN hato’o deklarasaun polítika kona-ba Informasaun ne’ebé espalha katak ema mafioso sira ou operasaun máfia no grupu ilegal ne’ebé tama ona iha rai laran. Situasaun sira hanesan ne’e ameasa segurança nasaun nian, estabilidade ekonómika no integridade Instituisaun Estadu nian. Husi Bankada KHUNTO hato’o deklarasaun hodi lamenta ho deklarasaun husi líder edukativu ensinu superior ida nian ne’ebe hatete katak inan aman sira iha responsabilidade, atu eduka no investe iha sira nia oan.
Iha intervensaun diversas, Deputadu sira aprezenta problema sira hanesan: lixu barak iha kapitál Díli, kondisaun infrestrutura iha area Kristu Rei precisa atensaun imediata, kondisaun estrada iha Díli no munisipiu sira, aldeia balun seidauk hetan acesso ba eletricidade, Joven mane ida ho iniciativa rasik produz ona sabaun iha munisipiu Liquiçá husu Governu tau atensaun; merkadu Taibessi kontinua desorganizadu; no informasaun importante seluk iha area saude, edukasaun, no infraestrutura bazika ne'ebé presiza atensaun husi Governu.
Sesaun plenária ne'e, prezidi husi Prezidente Parlamentu Nasionál, Maria Fernanda Lay, akompañia husi membru Meza sira, no hetan prezensa husi Vice-Ministru Asuntu Parlamentár, Adérito Hugo da Costa.
