DILI (TOP) – Governu liu husi reuniaun Konsellu Ministru sira, deside 'sulan' hikas populasaun sira iha Dili no munisipiu balun, tanba dehan moras pandemia Covid-19 no variante Delta oras ne’e la’o maka’as tebes iha komunidade nia le’et, no númeru mate mós aumenta maske mate ho moras seluk ida.
Konsellu Ministrus aprova projetu Rezolusaun Governu ne’ebé impoen konfinamentu domisilariu jerál ba populasaun iha munisípiu Dili, entre tuku 00:00 loron 27 fulan-agusto to’o tuku 23:59 loron 2 fulan-setembru tinan 2021.
Nune’e, impoen konfinamentu dimisiliáriu jerál ba ema hotu ne’ebé maka hela ka agora daudaun iha Munisípiu Dili, ne’ebé tenke hela iha sira-nia uma ka iha sira nia alojamentu temporáriu, ne’ebé inklui sentru akollimentu, exetu iha situasaun ne’ebé prevee iha diploma ne’e, liuliu tanba razaun saúde, serbisu, asesu ba sasán no servisu nesesidade bázika nian no simu vasina kontra COVID-19.
Iha área hotu-hotu munisípiu Dili nian, bandu atu transporte públiku, liuliu táxi, mikrolete, biskota no anguna halo sirkulasaun.
Suspende selebrasaun relijioza koletiva, no bandu mós atu hala’o serimónia fúnebre ne’ebé envolve partisipasaun ema na’in sanulu liu, sira ne’ebé, durante serimónia ne’e rasik tenke uza máskara oin nian hodi taka inus no ibun no mantein distánsia, pelumenus metru ida ho ema seluk ne’ebé prezente iha serimónia ne’e.
Estabelesimentu komersiál, industriál, artezanál ka prestasaun servisu nian taka ba públiku, ho exesaun ba estabelesimentu sira ne’ebé autoriza iha Rezolusaun Governu ne’e, liuliu estabelesimentu ne’ebé fa’an ai-han no sasán nesesidade bázika nian, eletrisidade, telekomunikasaun, prestasaun kuidadu médiku, farmásia, postu kombustivel nian, no instituisaun finanseira sira.
Restaurante sira bele fornese hahán iha rejime take away ka entrega iha uma de’it no estabelesimentu sira-seluk ne’ebé taka ba públiku bele dezenvolve ninia atividade liuhusi servisu entrega ba uma de’it.
Vendedór ambulante ba sasán alimentár no sasán ba nesesidade bázika bele mantein sira-nia atividade. Merkadu sira munisípoi nian, Manleuana no Taibessi, mantein ninia funsionamentu, husi tuku 6 dadeer to’o tuku 6 loro-kraik.
Aprova mós projetu Rezolusaun Governu nian ba:
- Ne’ebé impoen serka sanitária iha munisípiu Dili no Ermera to’o tuku 23:59 loron 13 fulan-setembru;
- Ne’ebé impoen serka sanitária iha munisípiu Baucau no Covalima hahú husi tuku 23:59 loron 26 fulan-agustu tinan 2021 to’o tuku 23:59 loron 8 fulan-setembru tinan 2021 ;
- Ne’ebé mantein impozisaun serka sanitária iha no inklui área sira husi Suku Naimeco, iha postu administrativu Pante Macassar, no suku Bobometo, iha postu administrativu Oesilo, suku sira ne’e iha Rejiaun Espesiál Oe-Kusi Ambeno to’o tuku 23:59 loron 8 fulan-setembru.
Nune’e, bandu sirkulasaun ema sira-nian entre área no munisípiu sira ne’ebé refere ona no sirkunskrisaun administrativa sira-seluk, exetu iha kazu hirak ne’ebé nia fundamentu forte tanba razaun sira seguransa públika, saúde públika, asisténsia umanitária, manutensaun ba sistema abastesimentu públiku ka razaun seluk ne’ebé presiza atu hala’o ba interese públiku nian. La inklui iha proibisaun sirkulasaun ida-ne’e indivíduu sira ne’ebé komprova vasinasaun kompleta (doze rua) kontra COVID-19, no mós ba labarik sira ho idade tinan 6 mai kraik ne’ebé akompaña.
