Inundasaun estraga natar lubuk ida iha Ambeno

AMBENO (TOP) – Udan boot ne’ebé akontese iha loron 04 Abril 2021, la’os lori de’it dezastre boot iha munisipiu Dili, maibé iha Oe-Kusi Ambeno mós hetan dezastre maka’as hanesan natar lubuk ida maka oras ne’e nakfilak tiha ba mota dalan.

Xefe Suku Lifau, Krisantos Kolo hateten, udan boot ne’ebé akontese iha semana kotuk la’os de’it estraga natar sira iha suku Lifau, maibé estraga mós komunidade sira nia uma iha aldeia tolu ne’ebé partense ba suku Lifau hanesan, aldeia Oe-Molo hamutuk uma kain 24, Nefo-Bai hamutuk 67, no Tula-Ika hamutuk 20. Uma kain hamutuk 107 maka hetan estragus iha suku Lifau.

Mota mós tama iha natar Tetu-Mnanu.

“Sira hetan ona ajuda emerjensia itoan, maibé kona-ba natar sira ne’e parte autoridade mós oras ne’e sei halo hela levantamentu dadus,” hateten Santos Kolo via kontaktu telemovél ba The Oe-Kusi Post (TOP), Domingu 11 Abril 2021.

“Uma 100 resin hetan estragus, tanba impaktu husi bee sobu rahun barajen Noe-Nitu maka bee tun mai komunidade sira iha aldeia Nefo-Bai, Oe-Molo no Tula Ika,” alumni UNPAZ ne’e esplika.

Natar sira ne’ebé hetan estragus maka’as maka iha ponte Noe-Fefan nia okos ka natar Tua-Leu ho Kaktua-Ana.

Nune’e mós Xefe Suku Bobokase, Sebastião Cob katak, iha uma kain hamutuk 47 maka hetan estragus husi inundasaun semana kotuk, inklui natar rua mós hetan estragus.

“Uma kain 47 ne’e hetan ona ajudu emerjensia, maibé natar sira ne’e maka seidauk,” nia hatete.

Xefe aldeia Nianapu (Suku Bobometo), Mateus Ato dehan, iha uma kain ida de’it maka hetan estragus, tanba anin boot maka hu’u monu tiha, uma nain ne’e maka Silvester Ulan ne’ebé to’o oras ne’e seidauk hetan apoiu umanitaria ruma husi parte relevante sira. Maske nune’e, maibé iha uma kain hamutuk 16 maka lakon sira nia natar, tanba mota maka sobu.

Rai-henek nakonu iha natar laran iha aldeia Ninapu, suku Bobometo.

“Natar Usapi-Ana nia kanu ne’e maka a’at total. Agora hare sira foin maka iha isin itoan, maibé bee la tama, tanba kanu ne’e maka mota sobu tiha,” esplika Mateus Ato.

Entretantu, tuir informasaun ne’ebé TOP asesu husi pajina ofisial Sekretadu Rejional Agrikulta nian katak, natar hamutuk hektar 35 ho nia total benefisiariu agrikultor nain 60 maka hetan estragus maka’as husi inundasaun ne’e.

Natar sira iha Bara Santo, aldeia Manuinpena, suku Lalisuk mós barak maka mota sobu tiha.

Anin sobu tiha uma tolu iha aldeia Keno, suku Lela-Ufe foin lalais.

No iha bairu Kak-Ana, aldeia Keno, suku Lela-Ufe rezulta uma kain tolu maka anin sobu rahun tiha.   

The Oekusi Post
Author: The Oekusi PostWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
www.OeKusiPost.com nu’udar plataforma media online iha Oe-Kusi Ambeno, Timor-Leste ne’ebé aprezenta notísia iha área oioin iha teritóriu nasionál. Rua. Numbei, Oe-Kusi Ambeno Mobile: +670 7723 4114 Email: info (at) OeKusiPost.com

PUBLISIDADE