DILI (TOP) – Pontu ida husi petisaun ne’ebé hato’o husi joven sira mak nomeasaun ba Sekretáriu Rejionál sira iha Oe-Kusi Ambeno to’o oras ne’e seidauk iha, maibé Prezidente Autoridade ba Rejiaun Administrativu Espesial Oe-Kusi Ambeno, José Luis Guterres ‘Lugu’ promete ona, sei hatama lista kandidatura hirak ne’e iha semana ida ne’e nia laran.
Sekretáriu Rejionál sira iha mandatu eis Prezidente Autoridade RAEOA, Mari Alkatiri hamutuk ema nain 7 de’it, maibé ba mandatu Lugu ne’e nian aumenta tan ema nain 2 husi partidu FRETILIN hodi hamutuk ema nain 9.
Lugu hatutan, durante ne’e nia halo hela konsulta ho lider autoridade lokal sira hotu inklui partidu politika sira hotu ne’ebé eziste iha Oe-Kusi Ambeno hodi bele mós partisipa iha administrasaun foun atu nune’e bele estabelese estabilidade sosial no politika.
“Talvez semana ida ne’e mak foin ba hasoru Primeiru-Ministru, Taur Matan Ruak,” Lugu hateten ba jornalista sira iha Ministériu Edukasaun Juventude no Desportu, Vila-Verde, Dili Tersa 09 Juñu 2020.
Nia argumenta, se laiha estabilidade sosial no politika, entaun investimentu sira ne’ebé durante tinan 5 halo tiha ona iha rai-ketan Oe-Kusi Ambeno sei la vale buat ida. Tanba ne’e, tuir Lugu katak nia halo ona esforsu hodi involve ema hotu iha nia administrasaun atu nune’e bele sente no goja sentidu rejiaun administrativu espesial no zona ekonomia sosial merkadu.
“Ha’u hanoin semana ida ne’e bele hatama ona. Ami halo opsaun iha nain 9,” Lugu promete.
Ema nain 9 ne’e sei okupa kargu sira hanesan Sekretáriu Rejionál ba Finansas, Sekretáriu Rejionál ba Edukasaun, Sosial no Saúde, Sekretáriu Rejionál ba Planeamentu Territorial, Sekretáriu Rejionál ba Administrasaun, Sekretáriu Rejionál ba Agrikultura no Dezenvolvimentu Rural, Sekretáriu Rejionál ba Turizmu Komunitaria, Sekretáriu Rejionál ba assuntu Saúde, Sekretáriu Rejionál ba assuntu Obras Públiku, no Sekretáriu Rejionál ba assuntu Sosial no Antigu Kombatente.
