Oekusipost.com Dili – Amu Papa Francisco sei halo bensaun ‘Urbi Et Orbi’ ba mundu tomak iha horas tuku 6 lorokraik iha Vatikanu, no oras tuku 2 dadersan iha Timor-Leste.
Frater Diocesano, Dionisio Soares ne'ebé oras ne'e hala'o hela nia estudu iha Universidade Urbaniana Roma Itália, konvida sarani Katólika iha Timor-Leste, atu prepara aan hodi partisipa iha bensaun Apostólika 'Urbi et Orbi' husi pontífise Papa Francisco iha tuku 2:00 oras Timor Leste nian.
"Husu ba maluk saranı hotu atu partisipa orsida Madrugada tuku 2.00 Oras Timor-Leste nian no iha Vatikanu tuku 6 lorokraik," Frater Deo informa ba Oe-Kusi Post, Sesta 27 Marsu 2020.
Nia esplika lia-fuan Urbi et Orbi nia hun mai husi lian Latin katak 'Husi sidade ba mundu'. Bênsaun Urbi Et Orbi ne’e baibain Amu Papa haraik iha momentu tolu de'it, mak hanesan, iha momentu Depois de eleisaun ba Amu Papa foun, durante tempu Natal no tempu Paskua.
Nia define, Urbi Et Orbi iha konteúdu rua, primeiru Amu Papa nia mensajen ba mundu tomak no Bênsaun Apostóliku. Iha Bênsaun Apostóliku ida ne’e Amu Papa nu'udár Vigáriu Kristu nian (Vicarius Christus) sucessór Apóstolu ne'ebé hetan kbiit tomak husi Jesus Kristu rasik.
Amu Papa nu'udár Sucessór Apóstolu Pedro (Ministério Petrino) bele le’e fontes Bibliku iha Evanjellu: Mateus 18,18: Bainhira Jesus dehan ba Pedro, buat ne'ebé kore iha rai sei kore mós iha lalehan no buat ne'ebé kesi iha rai sei kesi mós iha lalehan. Ho lia seluk katak, saida mak ema halo iha rai nu’udar mós iha lalehan.
Fonte seluk iha Saun Mat 16, 19: “Ha'u sei fó save reinu lalehan ba imi buat ne'ebé o kore iha rai sei kore mós iha lalehan no buat ne'ebé o kesi iha rai sei kesi mos iha lalehan”.
Nune’e mós iha Saun João. 20,22-23: “Simu Espiritu Santu ba, ema hotu ne'ebé imi perdua sira salan sei hetan perdaun no ba ema hirak ne'ebé imi la perdua sira salan sei la hetan perdaun”.
Nia hatutan, ho bênsaun Apostólika ida ne’e babain (ordinária) haraik ba sarani sira hotu ne'ebé mak partisipa diretamente iha Prasa São Pedro no hirak ne'ebé akompaña liuhusi televizaun, rádio, no meiu konunikasaun hotu sei hetan induljénsia plenária tuir kondisaun sira hanesan: dei pecado venial, konfesaun no komuñaun entre loron 8 antes no depois, reza tuir intensaun Santo Padre nian.
Tempu Extraordinária iha momentu ida ne’e atu haraik grasa Apostólika (Indulgencia Plenaria) ba sarani hotu iha mundu tomak atu hasoru situasaun ida ne’e ho esperansa no fiar metin nafatin ba Maromak katak, Maromak sei la husik Nia oan sira mesak iha momentu difísil ida ne’e.
