Oekusipost Dili – Amu Papa Francisco husu ona ba sarani Katolika sira iha mundu tomak hodi reza hamutuk liu husi halo orasaun ekuménika iha oras tuku 20:00 kalan hodi prevene a’an husi pandemia Coronavirus Disease 2019 (CorVid-19).
Konvite Papa nian ne'e fó sai husi Arsebispu Dili no Pro-Prezidente CET, Dom Virgílio do Carmo da Silva, SDB , iha Sekretariadu Conferénsia Episcopál Timorense (CET) Rua 12 Novembru, Balide, Dili, Timor-LesteTimor-Leste, horisehik.
"Papa Francisco konvida sarani sira husi mundu tomak, atu reza hamutuk Orasaun Ami Aman dala ida, ba pandemia Corona Virus, iha tuku 20:00 (kalan) loron 25 fulan marsu 2020", Dom Virgílio konvida.
Dom Virgílio esplika, orasaun ne'e hanesan sinál solidariedade, hamutuk ho sarani hothotu iha mundu.
"Santu Padre sei reza iha Roma Itália ho oras lokál tuku 12: 00 (meiu día), no iha Timor tuku ualu kalan. Husu ba ita hotu, karik Ita halo Ita nia aatividade, maibé to'o tuku ualu kalan Ita bele pauza oitoan, reza Ami Aman ida hodi reza ba Pandemia Virus Corona ne'ebé agora daudaun ataka Mundu tomak", Dom Virgílio husu.
Relasiona ho Pandemia Virus Corona, Conferénsia Episcopál Timorense (CET), deside ona atu sarani sira akompaña misa paskál iha uma liuhusi Rádiu no Televizaun, ne'ebé hahú vigora iha Tersa loron 24 fulan marsu 2020.
Entretantu, Conferénsia Episcopal Timorense (CET), deside no ofisialmente anunsia pontu hitu (7), inklui husu sarani Sira atu akompaña misa Paskál tinan ne'e iha uma de'it, hodi evita Virus Corona 19.
Desizaun ne'e anunsia liu husi konferénsia imprensa, ne'ebé lee husi Arsebispu Dili no Pro-Prezidente CET, Dom Virgílio do Carmo da Silva, SDB , iha Sekretariadu Konferénsia Episcopal Timorense Rua 12 Novembru, Balide, Dili, Timor-Leste.
