DILI (TOP) - Reprezenta Prezidente Kámara Komérsiu no Indústria Timor-Leste (CCI-TL), Vise Prezidente Rui Castro no Vise Prezidente Eduardo Belo Soares hamutuk ho Diretór Ezekutivu CCI-TL hala’o enkontru negósiu ho Berjaya Roasters Pte Ltd, subsidiáriu ida hosi Berjaya Group Malaysia no operadór restaurante internasionál Kenny Rogers Roasters ne’eb’e reprezzenta husi Syaffiq Ali, Jerente Senior ba Dezenvolvimentu Negósiu no Marketing, hamutuk ho nia delegasaun.
Tuir informasaun ne'ebé The Oekusi Post asesu husi Pájina Ofisial CCI-TL katak, enkontru ida-ne’e hanesan parte ida hosi esforsu ida hodi hametin relasaun investimentu no komérsiu entre Timor-Leste no Malázia nomós loke oportunidade kolaborasaun ne’ebé luan liután ba setór privadu nasaun rua ne’e nian. Enkontru ne’e hala’o iha salaun enkontru CCI-TL,Acait,Dili.
Objetivu prinsipal husi enkontru ida ne’e maka halo diskusaun kona-ba oportunidade oioin kona-ba investimentu no dezenvolvimentu emprezariál iha Timor-Leste, inklui potensiál abertura no espansaun rede husi Kenny Rogers Roasters, no oinsa bele kompriende kona-ba ambiente investimentu no regulamentu negósiu nian, oportunidade parseria ho negósiu lokál sira, no identifika insentivu investimentu oioin ne’ebé disponivel.
Inisiativa ida ne’e mós sai pasu estratéjiku ida hodi hametin relasaun ekonómika, enkoraja investimentu estranjeiru, no kria oportunidade negósiu no empregu iha Timor-Leste.
Reprezentante Berjaya Roasters Pte, Ltd. mai aprezenta sira nia atividade negosiou ne’ebé hala’o ona iha nasaun (11) kompostu husi Malázia, Singapura, Filipina, Tailándia, Brunei Darussalam, Qatar, Emiradu Árabe Unidu, Índia, Nepal, Arábia Saudita, no prepara atu habelar ba Kosta Marfim.
Berjaya Roasters Pte Ltd koñesidu nu'udar na'in no operadór ba marka restaurante Kenny Rogers Roasters, ne'ebé serve na’an manu no manu-tolun nu'udar nia menu prinsipál.
Rede restaurante nian aumenta ona ba restaurante 200 liu iha nasaun (11) no ohin mai iha CCI-TL ho objetivu atu esplora oportunidade investimentu, dezenvolve rede Kenny Rogers Roasters, no harii parseria estratéjiku ho empreza sira iha Timor-Leste hodi hametin kooperasaun ekonómika entre Malázia no Timor-Leste.
CCI-TL fó benvindu ba inisiativa ne’e no afirma kompromisu CCI-TL nian hodi harii parseria estratéjiku ho negósiu internasionál sira.
CCI-TL konsidera Enkontru ho Berjaya Roasters,Pte,Ltd. hanesan oportunidade exelente ida hodi introdús potensiál investimentu Timor-Leste nian ba investidór internasionál sira, enkuantu loke mós oportunidade ba kolaborasaun ne'ebé fó benefísiu ba malu iha parseria ne'ebé metin nasaun rua ne'e "Timor-Leste no Malázia’’ sei kontribui maka'as ba kreximentu ekonómiku ne'ebé inkluzivu no sustentável.
Nu’udar organizasaun ne’ebé reprezenta komunidade emprezariál iha Timor-Leste, CCI-TL sei kontinua fasilita diálogu, promosaun investimentu, no parseria estratéjiku ho parseiru internasionál oioin hodi apoia dezenvolvimentu ekonómiku nasionál ne’ebé sustentável.
