Iha loron 26 Agosto, iha Padiae, iha enkontru ho komunidade, Komisaun Organizadora anunsia katak labarik feto ida, Augusta de Almeida, atu lê poezia ida. Poema mak tuir mai ne’e: 

LÁPIS

Lápis… Lápis…. Ohhh lápis !!!

Ó ai-maran rohan ida

Ó nia isin krekas maran ruin

Ó la vale ba ema nebé la presiza

Maibé... ema temi nafatin Ó, naran Lapis!

           

Lápis... Lápis… Lápis… !!!

 

                        Ó nia matenek falun-an, hosi rohan ba rohan, hosi ain to’o ulun

                        Ha’u sei halo Ó isin terus, kolen, kanek, naklés no lakon isin balun

                        Tan ha’u presiza Ó nia matenek!

 

Lápis...   Lápis…   Lápis … !!!

Ó mak hanorin ha’u liman riska tun-sa’e

Ó mak hanorin ha’u hakerek número: ida, rua, tolu to’o rihun

Ó mak hanorin ha’u hakerek alfabetu: a, b, c, to’o z!

           

Lápis…  Lápis…  Lápis… !!!

           

Ó mak hanorin tan ha’u hakerek liafuan ‘guerrilheiro’ ka ‘funu-nain’

                        Ó mak hanorin ha’u hakerek forma fraze ‘Timor-Leste ukun rasik-an’!

 

Lápis…  Lápis...  ohhhhh.... Lápis!!!

 

Ó nia terus, susar no kolen ha’u selu labele

Tan Ó ai-rohan úniku ida...

Hau fó deit Ó naran,

Ó naran ‘Lápis Xanana’!

 

Oe-Cusse, 22/08/2020

Leitora: Augusta de Almeida

Escritor Poema: Domingos Nessi

Dadolin Murak

Doben
aban ó ba rai dook
ohin iha ó-nia sorin
ha’u husu ó
atu husik hela
hamnasa-mihis pedasuk-oan ida
mai ha’u

Ó bele husik hela
ó-nia hamnasa mihis ne’e
iha borbaleta furak sira
be semo bá-mai
iha ai-funan tahan

Nune’e
wainhira ha’u saudades, no
hanoin loos ona ó
ha’u bele husu
borbalete furak ne’e
atu hatudu
ó-nia hamnasa-mihis murak ne’e
mai ha’u

Doben
molok ó hakat
ba tasi-balun
ha’u hakarak husu mós ba ó
atu husik hela
ó-nia iis pedasuk oan ida
mai ha’u

Ó bele husik hela
iis pedasuk murak ne’e
iha ai-funan roza murak
be buras iha jardim

atu nune’e
wainhira ha’u saudades loos ona
ha’u bele horon
Ó-nia iis murak
Iha ai-funan roza furak ne’e

Doben
ha’u mós hakarak husu ó
atu rai hela
mehi pedasuk oan ida
liu husi fulan no fitun naroman
atu nune’e
wainhira ha’u toba
ita rua bele homan
mehi hamutuk
ho fulan no fitun sira

Doben
molok ó semo
ba dook
ha’u mós hakarak husu
atu ó hananu hela
knananuk domin ida
mai ha’u

Ó bele rai hela
knananuk domin ne’e
ba manulin sira
iha ai-leten
atu nune’e
wainhira ha’u hadeer
manulin sira
bele hananu knananuk
domin ne’e mai ha’u

----
DM/
Kablaki-hun, 2010-2020.

Mak ne'e deit

PUBLISIDADE