Covid-19 produz fali osan barak iha Ambeno

AMBENO (TOP) – Moras virus corona (Covid-19) konsege hamate ona ema barak iha mundu, maibé moras pandemia ne’e konsege produz rendimentu barak iha Rejiaun Administrativu Espesial Oe-Kusi Ambeno (RAEOA).

Sekretáriu Rejional Saúde Oe-Kusi Ambeno Manuel da Costa hateten, lala’ok prevensaun moras Covid-19 iha rai-enklave ne’e, parte autoridade sira serbisu hamutuk ho imigrasaun implementa ona koima ba sidadaun sira ne’ebé tama obrigatoriu iha kuarentena.

Nia esplika, sidadaun sira ne’ebé hala’o tranzasaun ilegal liu husi fronteira tasi no rai-maran, Estadu iha ona dekretu prezidensial kona-ba Estadu emerjensia katak ba sira ne’ebé tama ilegal no hala’o tranzasaun ilegal tenki hetan koima, no relasaun ba koima ne’e tutela iha serbisu imigrasaun obrigatoriamente tenki kumpri loron 14 iha kuarentena, no iha loron 10 nia laran sidadaun sira tenki foti sampel hahu kedas ho koima.

Sekretariu Rejional Saúde husi partidu FRETILIN ne’e katak, valor husi koima ne’e hahu husi osan U$25.00 dolar to’o U$250.00 dolar depende sira nia sala ne’ebé halo tuir dekretu lei prezidensial ba Estadu emerjensia sei halo koima ba sidadaun sira ne’ebé halo movimentu ilegal iha fronteira.

“Ita ezekuta ona dekretu ne’e, iha Sesta semana kotuk, ita halo libertasaun ba ema nain 63 ne’ebé mak kumpri ona loron 14 iha kuarentena, husi 63 ne’e iha nain 11 maka tama kategoria koima, no koima ne’e parte imigrasaun rekolla ona no selu ona iha loron Sesta ne’e no ema ida hetan U$ 70.00, no U$40.00 dolar ne’e selu swab no U$30.00 selu koima. Sira nain 11 ne’e total koima hamutuk U$770.00,” hateten Sekretáriu Rejional Saúde Oe-Kusi Ambeno Manuel da Costa ba The Oe-Kusi Post (TOP) iha nia serbisu fatin iha Oe-Kusi Ambeno, Kuarta 11 Fevereiru 2021.

Raimundos Oki
Author: Raimundos OkiWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Xefe Redasaun & Editor

PUBLISIDADE