DILI (TOP) – Povu kbi'it la'ek sira iha Rejiaun Administrativu Espesial Oe-Kusi Ambeno (RAEOA) kuaje hetan hotu ona ai-han (foos) ne’ebé ajuda husi governu no setor privadu sira.
Xefe Gabinete Interinu Prezidente Autoridade ba RAEOA, Agustinho Caet hateten, suku 18 iha Ambeno kuaje hetan hotu ona foos, no falta suku balun de’it mak oras ne’e seidauk hetan, tanba sei ajuda Ambeno oan sira liliu estudante sira ne’ebé hela iha Dili. Prosesu fahe nesesidade báziku ne'e la hare ba ema tenke iha kartaun militante partidu ida nian mak foin bele hetan, maibé fahe ba kbi'it la'ek sira hotu.
Caet esplika governu sentral desidi fó foos saku 6000 ba Oe-Kusi Ambeno. Saku 1000 mak fahe tiha ona, no saku 5000 seidauk bele foti tanba rezerva foos iha Dili laran la sufisienta, maibé sei hetan hotu bainhira foos mai to’o Dili.
“Ita hetan foos saku 1000 husi governu sentral, saku 750 mak ita lori ba fahe iha Oe-Kusi Ambeno, no saku 125 mak fahe ba Ambeno oan sira ne’ebé hela iha Dili,” hateten Caet ba jornalista sira iha Hotel-Timor, Sabádu 16 Maiu 2020.
Maibé, molok hetan foos governu nian, emprezariu Ambeno oan sira halo uluk ona karidade hodi fahe uluk foos besik 10000 resin tantu iha Dili no iha Oe-Kusi Ambeno.
Dadus uma kain husi Administrasaun Estatal Oe-kusi Ambeno versaun 2020 nian hamutuk 19.839. Husi total ne’e , maioria familia kbi'it sira kuaje hetan hotu ona apoiu umanitáriu falta uma kain balun mak seidauk hetan, maibé sei hetan hotu iha tempu badak. No familia la'ós kategoria kbi'it to'o oras ne'e seidauk hetan.
Oe-Kusi Ambeno ne’ebé iha postu 4, suku 18, no aldeia 63 ne’e postu villa ka postu Pante Macassar mak iha populasaun barak liu ho total uma kain 10.820, tuir kedas postu Nitibe ho uma kain 3.644, postu Oe-Silo kompostu husi uma kain 3.310, no ikus liu mak postu Pasabe (Abani) ho nia total uma kain 2.065.
Notisia relevante: Uma Kain 19.839 Iha Ambeno "Hein Ona" Subsidiu
Caet hatutan, husi suku 18 ne’e, falta suku Tai-Boko, Usif-Taku (Uistaku), Lela-Ufe, Bana-Afi (Ban afi), Nipane, uma kain balun iha suku Costa inklui lalisuk, maibé maioria hetan hotu ona.
“Ida ne’e akontese, tanba esforsu Prezidente PA RAEOA, José Luis Guterres “Lugu” ne’ebé durante ne’e la’o ba-mai Oe-Kusi Ambeno-Dili hodi hetan apoiu lalais,” Caet esplika.
Nia hatutan, se Lugu mak la la’o ba-mai Oe-Kusi Ambeno – Dili, povu sira iha rai-ketan ne’e seidauk bele hetan apoiu umanitáriu. No, foos saku 250 oras ne’e sei kontinua fahe ba Ambeno oan sira iha Dili laran.
“Suku Malelat ne’ebé nunka hetan vizita husi estrutura RAEOA tuan, ami tama tiha ona, no populasaun sira hetan hotu ona apoiu umanitáriu,” nia esplika.
Maske apoiu umniatáriu kuaje hetan hotu ona, maibé subsidiu osan $100 mak to’o oras ne’e seidauk hetan.
