MAPKOMS promete lei sibernétiku sei iha 2022

BALIBO (TOP) – Governu liu husi Ministru Assuntu Parlamentar no Komunikasaun Sosial (MAPKOMS), Francisco Jerónimo promete ona entre tinan 2021 ka 2022 Timor-Leste sei iha ona lei ba krime sibernétika hodi regula informasaun sira ne’ebé sirkula iha plata forma media sosial sira la ho faktu.

“Lei krime sibernetiku oras ne’e iha hela prosesu laran, no hein katak iha tinan 2021 ka 2022 bele iha ona hodi regulariza informasaun sira ne’ebé ema habelar iha plata forma media sosial sira,” hateten Ministru Francisco bainhira partisipa iha komemorasaun trajédia Balibo Five ba dala 45 iha postu Balibo, munisipiu Bobonaro, Sesta 16 Outubru 2020.

Governante husi partidu FRETILIN ne’e mós observa informasaun sira ne’ebé durante ne’e namkari iha plata forma media sosial barak liu mak informasaun falsu, no ataka liuba ema nia privasidade.

“Iha tan uja ID falsu aproveita liberdade ida ne’e, demokrásia ida ne’e lakohi tau loos ita nia naran, maibé tau fali ema seluk nia naran dalaruma ema ne’e mate tiha ona mós ita tau nia naran iha ne’eba hodi bele ataka ema seluk, ha’u hanoin ida ne’e presija duni atu regulariza atu nune’e ema hotu bele la’o iha regra nia laran, no la’o iha armonia nia laran”.

Entretantu, Prezidente Konsellu Imprensa Timor-Leste, Virgilio “Lamukan” da Silva Guterres katak, iha lei balun tuir Konsellu Imprensa nian presija maka lei kona-ba krime sibernétiku hodi bele regula buat balun hanesan diskursu odiu (hate speech) iha plata forma media sosial, tanba diskursu odiu ho notisia falsu ne’e ohin loron mosu barak liu iha plata forma dijital hanesan Facebook, Twitter sira ne’e.

“Iha imprensa eskrita sira ladun mosu buat sira ne’e, entaun presija lei kona-ba krime sibernétiku atu bele regulariza”.

Raimundos Oki
Author: Raimundos OkiWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Xefe Redasaun & Editor

PUBLISIDADE