MEMO (TOP) – Lider másimu Diocese Maliana, Dom Norberto do Amaral “hakfodak” no “diskorda” tebes ho deklarasaun politika husi politika nain sira iha Parlamentu Nasionál ne’ebé konsidera asaun karidade ne’ebé hala’o husi emprezariu Timor oan sira ho lider karismátiku Kay Rala Xanana Gusmão durante ne’e nu’udar asaun ida hodi hatun ema nia dignidade.
Bispo Diocese Maliana, Dom Noberto do Amaral kritika maka’as deklarasaun ne’e hodi husu ba deputadu sira bainhira atu hato’o deklarasaun politika ruma tenke koidadu hodi labele estraga aan rasik.
“Horseik ha’u le’e hela notisia ida iha media imprime balun, iha deputada ida ko’alia dehan asaun karidade ne’e hatun ema nia dignidade,” hateten Dom Norberto liu husi nia diskursu iha seremónia inagurasaun Klinika Madre Cecilia dos Santos iha Suku Memo, postu Maliana, munisipiu Bobonaro, Sábadu 25 Jullu 2020.
“Aduh, ha’u dehan ida ne’e ita ba ne’ebé? Karidade ne’e hatun dignidade ema nian, ne’e ita fehuk hotu ne’e. Fehuk ho bilang. Pada hal ha’u dehan tiha ona karidade ne’e mak sasukat ba ita tama ba reinu lalehan. Deputada mak ko’alia hanesan ne’e, ne’e ita ulun tun-ain sa’e”.
Bispo ho lian maka’as esplika tan dala ida katak, karidade ne’e akontese iha relijiaun hotu iha mundu rai-klaran nu’udar dalan ida atu lori ema sa’e ka tama ba reinu lalehan.
Tuir observasaun The Oe-Kusi Post (TOP) katak, asaun karidade ne’ebé hala’o husi Kay Rala Xanana Gusmão durante ne’e iha munisipiu sira hahu ona molok Estadu implementa subsidiu familia, no asaun karidade sei kontinua la’o to’o ohin loron.
Durante hala’o asaun karidade ne’e, topiku sentral ne’ebé Xanana apela ba komunidade sira mak kona-ba kontinua mantein ijiene pessoal hanesan fase liman bebeik molok han hahan, no tenke koidadu aan nafatin hodi evita moras virus corona (Covid-19) tama iha rai-laran.
