VENILALE (TOP) - Prezidente Repúblika, J. Ramos-Horta deside halo lansamentu ba konstrusaun uma hodi oferese ba sidadaun ema ho difisiénsia, Justino Guterres ho nia alin ne’ebé moris ho kondisaun vulneravel iha Postu Administrativu Venilale, Munisípiu Baucau, Sábadu, 18 Abril 2026.
Prezidente Ramos-Horta, esplika katak dalaruma programa sosiál sira sempre dehan katak mai husi programa governu, maibé Prezidénsia Repúblika, bainhira identifika katak iha duni nesesidade atu fó ajudu umanitáriu ba família vulneravel, ho lalais Prezidénsia Repúblika fó tulun hanesan saida mak halo ba Justino ho nia família.
Ne’e jestu solidariedade husi Timor-oan ba Timor-oan ne’ebé presiza liu tulun, tanba mandatu Prezidente Repúblika, J. Ramos-Horta nian hakarak Prezidénsia ida nakloke ba sidadaun hotu hodi hetan apoiu tuir kbiit ne’ebé iha.
Entretantu, durante tinan haat ikus ne’e, Justino sempre tuur iha dalan-ninin husi diresaun Baucau ba Viqueque hodi husu ajuda atu sustenta nia moris. Maibé iha tinan kotuk, hafoin ekipa Unidade Servisu Sosiedade Sivíl no Assuntu Sosiál Prezidénsia Repúblika (SSSAS) lidera husi Asesor Quintiliano Moníz halo identifikasaun no hato’o pedidu ba Prezidente Repúblika, ikusmai aprova no ohin halo lansamentu ba uma refere ho medida 7x5, kompleta ho mobiliáriu uma-laran nian no sei prontu iha fulan tolu tuir mai. Atividade hanesan ne’e la’ós foin akontese, maibé akontese ona ba família vulneravel sira desde tinan 2022 to’o agora.
Hafoin remata lansamentu, Prezidente Repúblika, J. Ramos-Horta, akompaña husi Ministru Agrikultura, Pekuária, Peskas no Floresta, Marcos “MAMETA” da Cruz, Vise-Ministru Komérsiu no Indústria, Augusto Júnior, PAM Baucau, Veneranda Lemos, hamutuk ho Komandante PNTL Munisípiu Baucau, fahe mós nesesidade bázika ba família kbiit-natoon sira ho totál 40 resin.
