DILI (TOP) – Embaixada Estadus Unidus Amérika (EUA) iha Timor-Leste anunsia ona inisiativa foun ba atividade tinan lima nian hodi haforte Organizaasun Naun-Govermental (ONG) sira iha Timor-Leste.
Komunikadu ba Imprensa ne'ebé The Oe-Kusi Post (TOP) asesu, e mbaixada Estadus Unidus nia Ajensia Internasional ba Dezenvolvimentu (USAID) sei oferese millaun $9.55 hodi implementa Programa Advokasia ba Governasaun Di’ak.
ONG lokal sanulu (10) sei selesionadu partisipa iha programa ne’ebé sei foka liu ba fortalesimentu institusional, peskiza, haluan rede kooperasaun no hasa’e kapasidade finansial. Objetivu programa ne’e nian mak ajuda ONG lokal sira hadi’ak sira nia abilidade no feramenta sira atu fornese servisu advokasia sustentavel ne’ebé bazeia ba evidensia no aspirasaun sidadaun Timor-Leste nian.
Embaixadora Fitzpatrikc anunsia inisiativa ne’e, nuudar parte ida husi Estadus Unidus nia selebrasaun Loron Independensia.
“Iha Estadus Unidus no Timor-Leste, ONG sira nia papel krusial iha advokasia ba direitu sira no nesesidade sidadaun hotu nian,” hateten Embaixadora Fitzpatrick.
Nia hatutan “Estadus Unidus oferese apoiu ba sosiedade sivil liu husi apoiu finansiamentu ba ONG lokal ki’ik sira liu husi programa kapasitasaun ho eskala bo’ot hanesan ida ne’e. Ami espera atu servisu hamutuk ho Timor-Leste nia ONG progresivu sira liu husi advokasia ba governasaun diak.”
Timor-Leste iha komunidade ONG ne’ebé forte dezde independensia maibe ONG barak ne’ebé mak foin harii iha limitasaun abilidade atu halo advokasia tanba menus kapasidade administrativa no apoiu finanseiru ne’ebé sustentavel. Programa Advokasia ba Governasaun Diak ida ne’e sei oferese formasaun tékniku no apoiu seluk atu ONG sira nia servisu sustentavel liu no bele reprezenta diak liu sidadaun sira nia interese ba governu.
Counterpart Internasional, kompañia dezenvolvimentu global ho baze iha Estadus Unidus, selesionadu atu implementa programa ne’e. Hau haksolok ho programa ne’e, tanba sei apoia liu tan ami nia asistensia atual ba instituisaun governu sira nian liu husi kriasaun parseria ho ONG sira,” hateten Diretor Misaun USAID Director Jim Wright.
Nia hatutuan ho interkambiu esperiensia no matenek entre organizasaun sira ne’e, bele apoia hadiak lei no polítika sira no kontribui ba Timor-Leste nia dezenvolvimentu sosial no ekonomia.
USAID nia Programa Advokasia ba Governasaun diak ne’e sei foka liu ba objetivu ha’at: Hadiak ONG sira nia kapasidade administrative no organizasional, hadiak sira nia advokasia, peskiza, abilidade analítiku no parseria atu bele responde ba aspirasaun sidadaun sira nian, hadiak jestaun no rendimentu regular no diversu sira ONG nian no promove ambiente favorável atu ONG sira sai independente liu tan.
ONG ho kualidade a’as sei ajuda governu sai akuntavel liu tan no transparente inklui reseptivu ba interese públiku, hodi apoia governu ida ne’ebé solidu no justu. Atividade ne’e sei hametin sistema demokrasia atu ajuda nasaun ne’e nia progresu ba auto-sufisiensia.
