DILI (TOP) – Primeiru-Ministru, Taur Matan Ruak promete ona ‘atu hasai’ ka troka tiha membru Unidade Polisia Fronteira (UPF) husi área fronteira rai-maran iha teritóriu nasionál hodi koloka fali membru FALINTIL-Forsa Defeza Timor-Leste (F-FDTL) nian atu asegura liutan área fronteira, tanba durante ne’e mosu movimentu illegal iha área ne’e.
Eis ulun boot F-FDTL ne’e preokupa ho liña fronteira ne'ebé durante tinan hirak nia-laran no tinan ida ne'e sai odamatan livre ba grupu organizadu hodi hakat ba-mai ilegalmente hodi konsidera nasaun Timor Lorosa'e la'os hanesan nasaun soberanu ne'ebé hamrik no eziste.
"Ha'u konkorda ho opiniaun katak Forsa Armada tenki fila fali ba fronteira. Ha'u konsulta ona ho prezidente republika no fo ona instrusoens ba Vise Ministru Interior ho Ministru Defeza halo diskusaun hodi tau forsa armada iha fronteira se la'os tinan ida ne'e entaun tinan oin antes ha'u nia mandatu hotu hakarak forsa armada iha fronteira," Promete PM Taur iha plenaria debate estensaun Estadu Emerjensia ba dala-17 iha Parlamentu Nasionál, Tersa 24 Augostu 2021.
Eis Guerrileiru ne'e fundamenta, ema hirak ne'ebé ilegalmente tama-sai fronteira la'os arbiru, maibé ne'e hanesan grupu organizadu no ida ne'e labele tolera beibeik tanba, fó imajen ida la di'ak hanesan nasaun soberanu ida.
"Ha'u bele hatete pasajen ilegais iha fronteira ne'e kuaze 98/99 porsentu hanesan krime organizadu. Iha elementu polisia no veteranu balun ha'u haruka kaer, buat ne'e (ilegal crossing) la'os foin maibe tempu naruk ona (viola beibeik) i daudaun ne'e iha ekipa servisu hamutuk ho Indonezia para tama sai uma (iha Atambua) kaer ema."
Tanba Timor Lorosa'e iha kooperasaun di'ak ho autoridade provinsia Kupang no ho embaixada iha Dili, hodi ajuda lori hikas sidadaun sira ne'ebe tama ilegal fila fali mai.
Entretantu, iha parte ida xefe governu orgullu maibe mos triste tanba maski esforsu ne'ebe mak durante ne'e polisia fronteira halo hodi kontrola ema ilegal, maibe sei iha elementu balun nafatin kontribui ba pasajen kontra lei.
"Ita nia polisia liuliu UPF halo esforsu bo'ot, ita bo'ot sira hanoin to'ok besik tinan 20 ema Atus Tolu Resin de'it troka malu iha ne'eba, ita tenki agradese ba esforsu no sakrifisiu tomak ne'ebe sira halo, maibé iha mós elementu balun (aproveita) halo ba sai negosiu (fasilita ema tama sai ilegal)."
Tanba ne'e, nia dehan hodi reforsa tan nia promesa katak konkorda ho opiniaun sira ne'ebe hakarak forsa armada destaka hikas fali iha fronteira.
Antes ne’e, autoridade Indonézia ka’er sidadaun Timor-oan lubuk ida ho atributu arte-marsiais Fuan-Domin ka Persaudaraan Setia Hati (PSHT) hakat illegalmente ba Atambua, Indonézia hodi sa’e sintu.
Kona-ba kestaun ne’e, ulun boot PSHT nian antes ne’e deklara ona, sidadaun sira ne’ebé halo movimentu illegal ba nasaun viziñu Indonézia hodi sa’e sintu ne’e laiha koñesimentu husi organizasaun arte-marsiais PSHT.
