DILI (TOP) – Koordenador Protesaun Sivil husi munisipiu 13 hetan ona formasaun monitorizasaun no evaluasaun husi Konsorsiu Internasional sira durante loron iha Dili.
Komunikadu Imprensa ne’ebé The Oe-Kusi Post (TOP) asesu, semana ne’e, reprezentante sira husi diresaun nasional ba Protesaun Sivíl prepara ona sira nia-an ba emerjensia ruma iha futuru liu husi atende treinamentu konaba Monitorizasaun, Evaluasaun no Aprendizazen (MEAL), ho apoiu husi Parseria Humanitaria Australia (AHP).
Objetivu husi treinamentu ida ne’e atu hasa’e kunhesimentu no abilidade partisipantes sira nian iha Monitorizasaun, Evaluasaun no Aprendizazen. Ida ne’e sei tulun sira atu halo planu ba kolesaun dadus no análize, no prepara relatoriu iha momentu sertu ba desizór sira durante no hafoin emerjensia. Iha treinamentu nia rohan, partisipante sira sei familiariza sira nia knár atualizadu bazeia ba Politika Jestaun Risku Dezastre Timor-Leste nian (DRM), espesialmente konaba Jestaun Risku Dezastre Bazeia ba Komunidade (CBDRM) atu hala’o knar iha preparasaun dezastre, redusaun risku no responde ba emerjensia iha nivel sub-nasional nian.
Konsorsiu husi Parseria Humanitaria Australia (konsiste husi CARE, Caritas Australia, Oxfam, World Vision no Plan International no parseiru lokal) fo ona treinamentu loron tolu ba koordenador Protesaun Sivíl nian husi municipiu 13 iha Timor-Leste nune’e mos ba funsionario Protesaun Sivíl/NDRMD nivel nasional iha sala reuniaun Ministériu Interior nian, husi loron 10 – 12 fulan Fevereiru 2021.
Reprezentante husi Embaixada Australia Carli Shillito hateten, “Monitorizasaun, Evaluasaun no Aprendizazem nudar parte importante ida ba serbisu hotu – Maibe importante liu mak jestaun dezastre adapta lalais ba sirkumstansia nia mudansa. Hau kontenti atu haree katak Protesaun Sivil no AHP halo prioridade ida nee no implementa treinamentu nee”.
Shillito hatutan, Australia kontente tebes atu apoiu servisu diak sira husi Sekretaria Estadu Protesaun Sivíl nian ba jere dezastre iha Timor-Leste no treinamentu ida ne’e nudar ezemplu seluk hodi kontinua kolaborasaun ne’ebe besik liu tan entre AHP no Protesaun Sivíl.
Diretor Paíz nian husi CARE International iha Timor-Leste no lider ba konsorsiu AHP nian, Peter Goodfellow komenta katak “ho lalais, informa ba desizór sira iha emerjensia, krítiku tebes atu salva vida ema nian no responde ba ema vulneravel sira husi membru sosiedade nian. Ami hein atu ba oin kontinua dezenvolve no apoiu estrutura jestaun dezastre sub-nasional nian atu tulun hodi asegura katak komunidade sira iha Timor-Leste nia laran tomak preparadu diak liu tan no reziliente hasoru impaktu husi dezastre naturais no mudansa klimátika”.
Iha nia diskursu enseramentu iha treinamentu nian, Sekretaria Estadu ba Protesaun Sivíl Joaquim José Gusmão dos Reis Martins hateten katak “Dezenvolvimentu umanu nudar save primaria atu dezenvolve instituisaun. Sekretáriu Estádu Protesaun Sivíl apresia kooperasaun amizade husi ajensia hotu-hotu nivel nasional no internasional espesial ba ajensia AHP sira, ne’ebe mak partisipa ativu apoiu dezenvolvimentu kapital umanu no investe iha area redusaun risku dezastre (RRD).”
Projetu Disaster READY hanesan komponente save ida husi programa Parseria Humanitaria Australia ka Australian Humanitarian Partnerships (AHP), no implementa husi konsorsiu AHP nian inluindu CARE International iha Timor-Leste, Caritas Australia, OXFAM, PLAN no World Vision, Organizasaun Nasional ba Ema ho Defisiensia Ra’es Hadomi Timor Oan (RHTO )hamutuk ho sira nia parseiru lokal sira. Disaster READY projetu ida ho durasaun tinan haat ho balun (2018 – 2022) servisu liu husi akordu ka MOU ida ho Sekretáriu Estadu Protesaun Sivíl, Ministériu Interior no koordenasaun besik liu ho Diresaun Nasional ba Jestaun Risku Dezastre (NDRMD) hodi harí inklusividade no aprosimasaun sustentével ba preparasaun dezastre no responde dezastre, husi komunidade ba nivel nasional.
Objetivu jeral husi Disaster READY mak atu hametin kapasidade humanitaria lokal ian no preparasaun iha Pacífiku no Timor-Leste atu nune’e komunidade prepara diak liu tan no bele responde ba dezastre no rekopera husi dezastre ne’ebé mosu neneik no mosu lalais. Programa save sira mak foku ba preparasaun dezastre, reforsa kunhesimentu no abilidade, hasa’e liu tan redusaun risku dezastre, reforsa systema atensaun sedu no hametin liu tan koordenasaun no parseria ho foku especial ba igualidade jéneru no disabilidade no reforsa protesaun labarik liu husi involvimentu governu lokal, sosiedade sivíl no lider relijiozu sira.
