DILI (TOP) — Primeiru-Ministru (PM), Kay Rala Xanana Gusmão ohin semo ona ba Vietnam hodi hametin liu-tan relasaun entre nasaun rua iha área estratejiku sira.
PM Xanana hala’o vizita ofisial ohin ba Repúblika Sosialista Vietname durante loron tolu, husi loron 8 to’o 10 Juñu 2026, ho objetivu atu hametin relasaun bilaterál no promove kooperasaun entre nasaun rua.
Tuir ajenda vizita nian, Primeiru-Ministru sei hala’o enkontru kortezia ho Sekretáriu-Jerál Partidu Komunista Vietname no Prezidente Vietname, To Lam, iha sede Sentrál Partidu nian iha loron Segunda, 8 Juñu 2026, no iha loron Tersa, 9 Juñu 2026 sei hato’o diskursu Estadu iha abertura Fórum Futuru ASEAN 2026, eventu ne’ebé halibur lideransa polítika, formuladór polítika no parseiru dezenvolvimentu sira hosi rejiaun no mundu.
Iha loron hanesan, Xefe Governu sei hala’o enkontru bilaterál ho Primeiru-Ministru Vietname, Le Minh Hung, atu diskute oinsá hametin tán kooperasaun entre nasaun rua iha área estratéjika sira.
Hafoin reuniaun bilaterál ne’e, Timor-Leste no Vietname sei asina akordu haat. Rua hosi akordu hirak ne’e relasiona ho Edukasaun no Ensinu Superiór, ho objetivu atu promove parseria entre instituisaun akadémika no peskiza, interkámbiu estudante no dosente sira, dezenvolvimentu programa formasaun no peskiza, no mós promosaun oportunidade bolsa estudu.
Notisia relevante: PR Horta hasoru malu ho Prezidente Repúblika Sosialista Vietname iha Singapura
Akordu rua seluk kona-bá izensaun vistu bá portadór pasaporte komún no kooperasaun entre Agência Noticiosa Timor-Leste-TATOLI, I.P., ho Viet Nam News Agency (VNA).
Durante vizita ne’e, PM Xanana mós sei hasoru malu ho Prezidente Assembleia Nasionál Vietname, Tran Thanh Man, atu diskute relasaun entre instituisaun lejíslativa sira no oportunidade kooperasaun entre nasaun rua.
Iha loron Kuarta, 10 Juñu 2026, Primeiru-Ministru sei hala’o enkontru bilaterál ho Subsekretária Estadu Parlamentár Reinu Unidu no Ministra bá Indo-Pasífiku, Seema Malhotra MP, atu troka hanoin kona-bá asuntu rejionál no internasionál.
Akompaña Primeiru-Ministru durante vizita ne’e maka Vise-Primeiru-Ministru, Ministru Koordenadór ba Asuntu Ekonómiku no Ministru Turizmu no Ambiente, Francisco Kalbuadi Lay; Ministru Negósius Estranjeirus no Kooperasaun, Bendito dos Santos Freitas; Ministra Edukasaun, Dulce de Jesus Soares; Ministru Komérsiu no Indústria, Filipus Nino Pereira; Vise-Ministra bá Asuntu ASEAN, Milena Maria da Costa Rangel; Sekretária Estadu Komunikasaun Sosiál, Expedito Ximenes no Xefe Gabinete Primeiru-Ministru, Elizabeth Exposto.
PM Xanana ho delegasaun sei fila-fali mai Díli iha loron 11 Juñu 2026 ho aviaun Aero Dili.
