KOVALIMA (TOP) – Povu Kovalima hamutuk ho Sekretariadu Konsellu Veteranu Kombatente Libertasaun munisipiu Kovalima husu ba Ministériu Públiku atu loke prosesu investigasaun hasoru António Ai-Tahan Matak nia deklarasaun iha plata forma media sosial relasiona ho kazu matebian Dom Basilio do Nascimento.
The Oe-Kusi Post (TOP) observa Ai-Tahan Matak hato’o nia deklarasaun pessoal iha nia konta media sosial (Facebook) iha loron 30 Outubru 2021 katak, Kovalima oan sira maka uja "virus fekit" hodi oho Amo Bispo Dom Basilio do Nascimento no saudozu Fernando La Sama de Araújo ne'ebé mate bainhira hala'o kna'ar iha munisipiu Kovalima.
Relasiona ho publikasaun ne'e Sekretariu Konsellu Veteranus Kombatentes Libertasaun Munisipiu Kovalima Ozorio Soares "Mausoko" rezeita informasaun ne'ebé António Ai-Tahan Matak públika iha media sosial, tanba ne'e nia husu ba Ministériu Públiku (MP) ho Ministériu Assuntos Kombatentes Libertasaun Nasional (MSKLN) atu halo identifikasaun hodi investiga nia.
"Statement ne'ebé António Ai-Tahan Matak fó sai ne'e dehan Fernando Lasama ho Amo Bispo Dom Basilio mai Kovalima dehan ami maka oho, Kovalima ne'e atu oho lider sira ne'e tansa? Uluk António Ai-Tahan Matak subar iha ami nia rai ami la oho, ne'ebé Ai-Tahan Matak labele naran ko’alia de’it karik seidauk hatene loloos nia motivu, ne'e duni ami veteranu Kovalima la simu informasaun ne'ebé nia públika ba públiku sira, ne'ebé ha’u husu Ministériu Públiku ho Ministériu Asuntu Veteranus nian atu investiga Ai-Tahan Matak nia Statement ne'ebé fó sai iha Públiku," Mausoko hateten ba jornalista sira iha Edifisiu KVKLN Kovalima.
Iha parte seluk, Administrador Munisipiu Kovalima, Francisco de Andrade husu ba António Ai-Tahan Matak atu halo aproximasaun ho médiku sira atu nune'e bele hatene loloos kondisaun Amo Bispo ho Fernando Lasama.
" Antonio Ai-Tahan Matak ne'e Veteranu ida ne'ebé ita respeita, maibé nia ko’alia fali hanesan feto ko’alia iha dapur laran, nia tenke halo aproximasaun ho médiku sira hodi hatene didi’ak kondisaun Amo Bispo ho La Sama ninian, tanba sira mate ne'e la’os Kovalima oan maka fekit, ne'ebé nia labele ko’alia arbiru," sujere Francisco de Andrade hodi hatutan só médiku sira makai ha kompetensia hodi pronunsia kauza husi lider nain-rua ne’e sira nia mate, la’os dun-matak fali ba ema seluk.
Lamentasaun hanesan mós hato’o husi akademista Kovalima-oan, Silvester Ferreira konsidera Ai-Tahan Matak nia hanoin hanesan infantil tanba informasaun ne'ebé nia fó sai iha media sosial ne'e laiha evidensia.
"Tuir ami akademista António Ai-Tahan Matak nia hanoin ne'e infantil tanba nia dun matak ko’alia tuir nia hakrak laiha faktu katak Kovalima oan maka uja ai-moruk hodi oho Fernando La-Sama ho Amo Bispo Dom Basilio, ami Kovalima-oan sente moe, ne'ebé ami husu Ai-Tahan Matak tenke responsabiliza ba nia hahalok ne'ebé maka nia halo, maibé tempu badak ami sei konvida autoridade lokal, veteranus, lider politiku sira atu hare asuntu ida ne'e," esplika akademista ne’e.
Povu Kovalima tomak konsidera deklarasaun Ai-Tahan Matak iha plata forma media sosial nu’udar insultu boot ida, tanba ne’e iha tempu badak sira sei halibur malu hodi hare kestaun ne’e.
Amo Bispo Dom Basilio do Nascimento mate bainhira hala'o "kna'ar" Missa ordenasaun saserdotal ba Amo Lulik nain-rua iha Postu Administrativu Zumalai, munisipiu Kovalima iha Loron Kinta 28 Outubru 2021 hafoin hetan moras atakasaun "moras fuan" ekipa médiku sira evakua ba HNGV Dili, maibe lakonsege salva nia moris.
Seremonia funebre ba Amo Bispo Dom Basilio do Nascimento hala'o ona iha loron Kinta 04 Novembru 2021 iha katedral Baukau.
