WARANA (TOP) – Abitante hamutuk 550 husi uma kain 140 iha aldeia Warana (bairro Akrema), suku Bikeli durante tinan barak ona seidauk asesu ba enerjia eletrisidade, estrada no bee moos.
Xefe suku Biklei Daniel Martins katak, aldeia Warana ka bairro Akrema parte norte ho leste baliza ho Liran, no parte oeste baliza ho Alor, Indonézia.
Nia hatutan, ho nia komunidade sira tomak sente kontente tebes ho prezensa Kay Rala Xanana Gusmão iha Akrema maske kondisaun estrada a’at tebes.
“Tuir loloos iha situasaun hanesan ne’e membro governu sira mak tenke mai hasoru comunidade sira, tanba ami mós hatene katak Avo Nana agora la tama iha estrutura governu nian,” hateten xefe Daniel bainhira hasoru malu ho Kay Rala Xanana Gusmão iha bairro Akrema, aldeia Warawan, suku Bikeli, postu Atauro, munisipiu Dili, Segunda 3 Agostu 2020.
“Maibé, tanba iha domin boot tebes ba nia povu mak ohin Maun Boot to’o mai fatin ida ne’e. Ida ne’e ami sente hanesan milagre ida,” nia afirma.
Molok Kay Rala Xanana Gusmão halo asaun karidade, xefe suku ne’e apresenta problema sira mak falta bee moos, kondisaun estrada la di’ak, no seidauk hetan asesu ba enerjia eletricidade.
“Problema boot liu mak bee moos. Iha Akrema ne’e sira iha bee, maibé laiha kualidade, tanba bee kontamina ho tasi been,” hatete xefe Daniel.
“Dalaruma problema ruma mosu iha ne’e susar tebes atu kontaktu malu”.
Kay Rala Xanana Gusmão simu pedidu eskrita husi komunidade Warana, Segunda 3 Agostu 2020. Foto The Oe-Kusi Post/Raimundos Oki.
Iha fatin hanesan, Kay Rala Xanana Gusmão rekoñese katak problema bee moos laiha, estrada la di’ak, no seidauk hetan asesu ba enerjia eletricidade la’os akontese de’it iha Akrema, maibé akontese mós iha fatin barak iha rai-laran.
Author:Raimundos OkiWebsite:https://www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
