CARE selebra loron mundial fase-liman

DILI (TOP) – Loron Mundial Fase-Liman nudar loron advokasia global dedikadu ne’ebé atu hasa’e konsiensia konaba importansia husi liman mos, espesialmente liu husi fase-liman ho sabaun no bé ne’ebé sulin, no hamosu mudansa permanente iha hahalok husi nivel politika to’o asaun ne’ebé lidera husi komunidade. Tema ba loron fase liman nian iha tinan 2020 mak “ijiene liman ba hotu-hotu”, ida ne’e nudar apelu ba asaun atu halo liman mos sai realidade ba hotu-hotu.

Atual pandemia COVID-19 foku ba papel kritiku husi liman mos no ida ne’e nudar aktu ida atu minimiza moras nia propagasaun. Tema tinan ida ne’e nian fó hanoin ba ita hotu konaba nesesidade atu toma asaun imediata konaba liman mos iha nivel publiku no privadu atu responde no kontrola pandemia COVID-19. CARE International iha Timor-Leste fiar katak, fase liman tenke sai responsabilidade ema hotu-hotu nian no tamba ida ne’e mak persiza melhora komportamentu iha nivel individu no mos iha komunidade, nune’e aktu ida ne’e sai ábitu no norma ida ba tempu naruk.

CARE International iha Timor-Leste selebra loron mundial fase-liman liu husi kampanha no atividades iha nivel oin-oin:

Husi loron 15 fulan Outubru to’o loron 15 fulan Novembru kampaña CARE nian sei inklui kompetisaun fase-liman iha facebook liu husi pájina LAFAEK CARE nian no iha tempu hanesan, CARE nia funsionariu hotu sei halo kompetisaun interna fase-liman nian durante loron 30. Projetu HATUTAN, finansia husi Departementu Agrikultura Estadu Unidus Amerika nian, sei lidera kompetisaun fase-liman hamutuk ho Ministériu Edukasaun, Juventude no Desportu. Kompetisaun ida ne’e sei dezafia estudante sira atu lidera no halo asaun fase-liman iha loron 30 nian laran nudar ábitu ida iha sira nia eskola iha Ainaro, Ermera, Liquica no Manatutu.

Projetu responde COVID-19 ne’ebé finansia husi Uniaun Europeia nian sei selebra loron mundial fase-liman iha eventu nivel komunidade liu husi entrega ekipamentu ijiene nian ba komunidade tarjetu iha Munisipiu Viqueque.

“Hanesan ita hahu dadaun kampaña ida ne’e, hau hakarak konvida CARE nia parseru sira, lider komunitária, manorin no estudante atu hamutuk ho ami iha periudu importante ida ba selebrasaun loron fase-liman nian. Ida ne’e importante tebes atu hanoin katak promosaun ba ijiene labele konsidera deit nudar eventu ida, maibe liu-liu nudar prosesu adaptivu no ajustamentu ida hodi bele apoiu liu tan mudansa ida sustentavel” hateten Peter Goodfellow, CARE International nia Diretor Paíz nian iha Timor-Leste. (ki)

Raimundos Oki
Author: Raimundos OkiWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Xefe Redasaun & Editor

PUBLISIDADE