DILI (TOP) – Instituisaun Polisia Nasionál Timor-Leste (PNTL) hetan tan ona kareta foun hamutuk 46 ne’ebé distribui ona hodi ajuda fasilita polisia nia serbisu iha teritóriu nasionál.
Ho distribuisaun kareta foun hirak ne’e, Komandante Jerál PNTL Komisariu Jerál Polísia, Henrique da Costa husu ba utilizador viatrua foun sira ne’e tenke ba serbisu Estadu nian.
Kareta foun hirak ne’e fahe on aba iha karreta kargu, no karreta operasional, ba unidade seguransa, departamentu, no mós tranzitu nasionál inklui tranzitu munisípiu Dili.
Kareta foun sira ne’e sosa ho Orsamentu Jerál Estadu prevee iha Orsamentu Retifikativu 2023 nian, liu husi prosesu aprovizionamentu Ministériu Interior no aprovizionamentu PNTL ho montante millaun USD 2.000,000,00 ba kareta unidade-46.
Distribuisaun ba primeiru faze, kareta ho modelu Toyota Rush hamutuk-23, Pick Up 3, Derek 1, ba iha diresaun komnadu jerál, xefe departamentu komandu jerál, gabinete komandu jerál, sentru formasaun Polísia, tranzitu nasionál, inklui tranzitu munisípiu Dili.
Ba segundu faze karreta ho modelu Sport hamutuk-20 sei distritu ba komandante sira iha Munisípiu 14, ba komandante Unidade no komandante supervizion 3, maibé segundu faze nian tuir planu sei hala'o distribuisaun iha tempu badak ho razaun tanba seidauk sosa kompletu.
Komandante Jerál Polísia Nasionál Timor-Leste (PNTL) Komisariu Jerál Polísia, Henrique da Costa hateten, viatura sira ne'e nia intensaun atu distribui ba Diretor Jerál no Gabinete sira tuir planu ne'ebé sira submete ba iha governu liu husi proposta orsamentu retifikativu 2023 nian.
"Tanba ne'e ita husu para kumpri duni orientasaun katak, karreta sira ne'e ita kompra ba iha departamentu sira ita tenke informa ba sira atu nune'e iha utiliza para fasilita serbisu," Komandante Jerál Polísia Nasionál Timor-Leste (PNTL) Komisariu Jerál Polísia, Henrique da Costa hateten iha nia diskursu iha serimonia fahe kareta foun sira ne’e iha resintu Komandu Jerál PNTL iha Kaikoli-Dili iha loron Tersa 02 Abríl 2024.
"Ita boot sira hatene katak sasan Estadu nian uza ba serbisu Estadu nian, la'ós ba utiliza ba interese pesoal depois to'o ikus mai hamosu asidente ruma, entaun ita tenke prontu responsabiliza," nia esplika.
Nia nafatin husu ba motorista sira ne'ebé mak atu lori kareta sira ne'e, tenke iha mós treinamentu ruma hodi bele lori kareta sira ne’e ho di’ak liu-tan.
Kareta foun iha ona, no kareta tuan hamutuk 23 sei hatama ba Patrimóniu Estadu hodi prosesa ba lelaun, tanba kareta tuan sira ne’e ninia gastus ba manutensaun a’as ona, nune’e tuir lei tenke hatama ba lelaun ona ba públiku.
