DILI (TOP) – Institutu Defeza Nasionál (IDN) ne’ebé durante ne’e konsege forma no produz ona ofisias barak tantu iha FALINTIL-Forsa Defeza Timor-Leste (F-FDTL) no Polisia Nasionál Timor-Leste (PNTL) sei transforma ba universidade ida.
Ministru Defeza, Donanciano Costa Gomes Pedro Klamar Fuik, kompremetidu durante nia mandatu sei tránsforma Institutu Defeza Nasionál ba Institutu Universitaria Defeza Nasionál (IUDN).
“Institutu Defeza Nasionál iha kauza justa depois de halo aktividade de formasaun akadémika barak ne’ebé mak halo tiha ona to’o agora. No IX Governu Konstitusionál haree katak ba kauza justa ida ne’e mak Institu Defeza Nasionál sei brevemente sei tránsforma ba Institutu Universitariu da Defeza Nasionál,” Donanciano Costa Gomes hateten ba jornalista sira hafoin ensera Promosaun Ofisiál Superiór tinan letivu 2023 -2024 ne’ebé halao iha Salaun Delta Nova foin lalais.
Governante ne’e esplika, IUDN sei iha fakludade rua importante mak ida siensia militár no polisiál ne’ebé hanaran akadémia konjunta enkuandra ho nia kursu sira mak hanesan kursu lideransa, kursu promosaun Ofisiál Superiór ne’ebé integra ho nia grau akadémiku Post Graduasaun no kursu Estadu Maiór Konjuntu ne’ebé integradu akdémiku mestradu iha área seguransa dezemvolvimentu nasionál sustentavél.
Enkuantu fakuldade ida seluk mak atu promove kursu Komandu Alta Diresaun no Kursu Komandu Alta Diresaun ne’e ba nivél topu liderana iha instituusaun militár polísia tantu institusaun relevante sira seluk.
“Kursu ida ne’e atu bele hamosu jestór topu iha Jenerál, Koronél iha institusaun militár ne’ebé mak iha ona responsablidade atu halo desizaun no kursu ida ne’e sei ajuda sira hotu atu bele torna instituisaun hanesan F-FDTL, PNTL no Institusaun relavante bele sai efisiente no efikas liu,” nia esplika.
Klamar Fuik hateten, transformasaun IDN ba Institutu Universidade Defeza Nasionál IX Governu Konstitusionál deskreve ona iha nia programa polítika durante tinan lima kuandu governu tau ona iha prioridade signifika governu sei kria kondisaun ba planu ida ne’e. Tanba governu kuandu dezeña ona iha nia programa signifika governu sei tau rekursu finanseiru no prepara ona kondisaun sira seluk ne’ebé mak nesesariu atu bele tau iha prátika ba iha ninian implementasaun.
“Fatin ba iha instálasaun Institutu Universidade Defeza Nasionál fatin ne’ebé ita dezigña mak iha Aileu, maibé ita bele identifika tanba fatin seluk para sai hanesan instalasaun ba ita-nia Insitututu Universidade Defeza Nasionál,” nia esplika.
Nia hatutan, obra ba Insitututu Universidade Defeza Nasionál sei hahú tinan 2025.
“Kuandu iha programa signifika iha planu no kuandu planu signifika iha orsamentu. Enkuantu ba orsamentu ha’u sei la hateten orsamentu hira tanba, ida ne’e sei haree prioridade ba alunus sira, depende ba neseidade instituisaun nian, liuliu sei haree husi númeru alunu, alunu ida gasta hira no kursu ne’e presiza professór hira no presiza sala hira, ita haree uluk kondisaun sira mak foin prepara orsamentu,” nia konklui.
