Oekusipost.com Dili – Portavóz Sentru Integradu ba Jestaun Krize, dotór Rui Maria de Araújo hateten, to’o oras ne’e sei iha ema hamutuk nain 215 mak sei hein hela rezultadu teste laboratóriu ne’ebé hasai tiha ona, no kazu konfirmadu ba loron ohin laiha, mantein ba 24.
Nia hatutan, total komulativu ba kazu konfirmadu laiha mudansa, 24 nafatin. Kazu konfirmadu foun mós laiha mudansa. Total kazu ne’ebé rekooperadu ka kuradu mós laiha mudansa, nain 6 nafatin. Nain 6 ne’e, nain rua husi kazu positivu, no nain 4 ne’e husi kazu provavél. Total kazu konfirmadu ne’ebé sei hela nafatin iha sentru izolamentu Vera Cruz hamutuk nain 22.
Nia esplika, total komulativu ba ezame laboratóriu ne’ebé halo to’o ohin, hahu husi loron 6 Marsu liuba hamutuk 629, horseik iha 597. Iha mudansa 32.
“Total komulativu ba hein rezultadu laboratóriu hamutuk 215, total rezultadu laboratóriu ne’ebé hatudu negativu hamutuk nain 390,” hatete dotór Rui liu husi konferensia ba imprensa iha Sala Situasaun Sentru Integradu ba Jestaun Krize iha Sentru Konvensaun Dili, Kuarta 29 Abril 2020.
Nia dehan, total ema iha kuarentena ka konfinamentu obrigatóriu 436. Husi total ne’e iha ema nain 38 mak halo auto-kuarentena ka izola a’an iha munisipiu sira, no nain 8 iha Dili. Ema nain 324 mak oras ne’e mak sei iha hela kuarentena sira iha Dili laran, no hamutuk nain 66 iha munisipiu sira.
