Oekusipost.com Dili – Ema hamutuk nain 29 ne’ebé durante ne’e halo kontaktu direita ho profisional saúde ida ne’ebé oras ne’e positivu kona moras virus corona (COVID-19) hasai ona teste laboratóriu, no sei evakua sira ba hela iha kuarente sira iha Dili laran hodi hetan tratamentu saúde intensivu.
Dotora Odete da Silva Viegas atualiza historia kontaktu profisional saúde ne’ebé positivu COVID-19 ne’e katak, hamutuk ema nain 29 inklui pasiente positivu ne’e nia familia sira.
“Profisional saúde nia historia kontaktu, nia hala’o kna’ar nu’udar profisional saúde hodi atende pasiente COVID-19 iha Vera Cruz. Ema ne’ebé mak durante ne’e nia kontaktu hamutuk nain 29, ne’e inklui ona familia rasik,” hatete dotora Odete liu husi konferensia ba imprensa iha Sala Situasaun Sentru Integradu ba Jestaun Krize iha Sentru Konvensaun Dili, Sábadu 25 Abril 2020.
“Ema sira nain 29 oras ne’e vizilansia epidemolojia foti ona sira nia dadus no dadauk ne’e atu submete ba iha kuarentena, fatin kuarentena,” dotora Odete esplika.
Nia hatutan, dadus ohin, total númeru teste hamutuk 409 kompara ho horseik 392. Rezultadu laboratóriu pendente sira hamutuk 19, horseik iha 21. Total kazu konfirmadu mantein, total kazu foun mantein, laiha. Total rezultadu laboratóriu negativu 367, kompara ho horseik nian 347. Total kazu rekoperadu ka kuradu nain 6, nain 5 horseik rekoopera, no nain ida kazu primeiru nian. Hamutuk 6. Númeru mate felizmente to’o agora seidauk iha. Total profisional saúde sira ne’ebé mak iha kuarentena mantein 23.
