Oekusipost.com Dili – Sidadaun kuarentena hamutuk nain 20 resin evakua ona ba hela fali iha fatin kuarentena foun iha Tasi-Tolu.
M édiku ida ne’ebé akompaña sidadaun kuarentena hirak ne’e katak, rajaun muda sira sai husi hotel ne’e, tanba hotel ne’e nu’udar fatin rikus ona.
Antes ne’e, Kuarta ohin tuku 11 dadersan mosu dezintendimentu entre sidadaun kuarentena hirak ne’e ho ekipa ambulansia bainhira atu ba foti tan Timoroan nain rua ne’ebé positivu ona kona moras virus corona (COVID-19). Bainhira ekipa ambulansia to’o iha hotel ne’e, sidadaun sira iha hotel ne’e nia laran la autoriza ekipa ambulansia atu tama halo evakuasaun, no hato’o sira nia ezijensia ba ekipa ambulansia ne’e katak governu tenke hasai (muda) sai sira husi Hotel-Katuas ne’e, tanba durante ne’e pasiente lubuk ida mak positivu ona kona moras ne’e, no sira konsidera katak hotel tomak ne’e nia laran kontaminadu hotu ona ho virus ne’e rasik.
Notice relevant: Sidadaun Karantina Hotel-Katuas Ezije Muda ba Fatin Seluk
Ikus mai sira nia ezijensia ne’e hetan duni resposta positivu husi governu hodi evakua tiha sira sai husi hotel ne’e ba hela fali iha Tasi-Tolu, Dili.
Hafoin prosesu negosiasaun ne’e la’o, ikus mai hetan solusaun di’ak hodi fó autorizasaun ba ekipa ambulansia sira konsege evakua tiha Timoroan nain rua ne’e iha oras tuku 1 meudia hodi lori sira ba hela fali iha fatin izolamentu iha sentru saúde iha Vera Cruz atu bele hetan tratamentu intensivu di’ak liutan.
Observasaun Oe-Kusi Post iha fatin evakuasaun sidadaun sira ne’e husi Hotel-Katuas ba Tasi-Tolu akontese iha horas tuku 6 lorokraik.
Hafoin to’o iha Tasi-Tolu, ida-idak tama hela iha kuartu ida, no iha ne’eba mós marka prezensa eis komandante em xefe Kay Rala Xanana Gusmão, ekipa seguransa, no ekipa médiku sira. Kareta hamutuk 11 mak halo evakuasaun ba sidadaun hirak ne’e.
Iha loron Sesta, 10 Abril 2020, rezultadu teste laboratóriu hatudu Timoroan ida positivu infetadu moras virus corona (COVID-19), no tuir fali iha loron Segunda 13 Abril 2020, hatudu tan Timoroan nain 2 positivu, no iha loron Tersa, 14 Abril 2020 hatudu Timoroan nain 2 tan positivu. No Kuarta ohin 15 Abril 2020, rezultadu teste hatudu timoroan nain 2 tan positivu ona. Husi númeru hirak ne’e hatudu katak to’o oras ne’e Timoroan hamutuk nain 7 mak positivu ona kona-ba moras COVID-19 iha Timor-Leste. Sira nain 7 ne’e oras ne’e kontinua hetan tratamentu intensivu iha sentru izolamentu iha sentru saúde Vera Cruz.
